Berriak Lehendakaritza

Lehendakariak Gasteizko Nazioarteko Zuzenbideko eta Nazioarteko Harremanetako Ikastaroetako ikasleei eta arduradunei harrera egin die

2021-07-14

Iñigo urkullu lehendakariak, gaur eguerdian, “20121eko Vitoria-Gasteizko Nazioarteko Zuzenbideko eta Nazioarteko Harremanetako Ikastaroetako ikasle, irakasle eta ikertzaileei egin die harrera. Besteak beste, Lehendakariak uda ikastaro ezagun hau koordinatzen eta zuzentzen duten hiru arduradunak agurtu ditu: José Luis de Castro UPV/EHUko Nazioarteko Harremanen titularra, Idoia Otaegui UPV/EHUko Nazioarteko Zuzenbide Pribatuko albokoa eta Juan Soroeta UPV/EHUko Nazioarteko Zuzenbide Publikoaren titularra.

Urkullu lehendakariak, bere hitzaldian, bertaratutakoentzat interesgarritzat jo dituen zenbait gai aztertu ditu: gobernantza berria; Europaren etorkizuna; eta euskal autogobernuaren eredua.

Lehen gaiari buruz, gobernantza berria, Lehendakariak nabarmendu du Euskadi izan dela Garapen Jasangarrirako 2030 Agendarekin (Nazio Batuek 2015ean onartua) konpromisoa hartu zuen Estatuko lehen administrazio publikoa; eta gogorarazi du joan den ekainean eguneratu egin zela Garapen Jasangarrirako Helburuekiko konpromiso hori, "2030 Agendaren Lehentasunen Euskal Programa" onetsita. Programa horren xedea "kontratu sozialaren kultura" sustatzea da. "Kontratu sozial berri bat", Covid-19k markatutako garai honetan garrantzi berezia hartzen duena; izan ere, erronka berriei aurre egiteko ahalmen eraldatzaile handia du, trantsizio sanitarioak eta sozialak, energetikoak eta ekologikoak, teknologikoak eta digitalak eragindakoak", gaineratu du.

Europaren etorkizunari dagokionez, Lehendakariak azaldu du aurten proposamen formal bat egin zaiola Europako Batzordeari, eskumen legegileak dituzten eskualdeen eginkizuna eta errealitate nazional bereziak indartzeko. "RLEG gutuna" izenekoa da, eta Gobernu sinatzaileek Batzordeari eskatzen diote beharrezko erabakiak har ditzala maila anitzeko gobernantza-eredua eta Europa federalaren etorkizuna errealitate eraginkor bihurtzeko. "Gure gobernuek Europako gobernantzan gehiago parte hartzea eskatzen dugu. "Next Generation EU" funtsen inguruko erabakietan ere bai”,

Euskal Autogobernuari dagokionez, Iñigo Urkulluk gogorarazi du Gernikako Autonomia Estatutua, 1979an adostasun baten ondorioz onartua, bete gabe dagoela oraindik. "Gaur, garai berri bat bizi dugu Euskadin eta etorkizun berri bat erakitzeko aukera dugu. Estatuari ere dagokio garai berri hau behar bezala kudeatzea, aniztasuna eta gehiengoaren borondate sozialak onartzea eta Estatu eredu berri bat planteatzea ", azpimarratu du.

Halaber, Lehendakariak azpimarratu du Gobernu Programaren konpromisoa "autogobernu gehiago eta hobea" dela. Hala, euskal autogobernuaren etorkizuneko ereduak oinarrizko adostasunak eta legezkotasuna errespetatuko dituen esparru juridiko politiko berri bat behar duela azpimarratu du. "Legezkotasun hori, jakina, ez da aldaezina. Aldatu egin daiteke, eta errealitate berrietara egokituz eboluzionatu behar du, herriaren borondatea errespetatzeak beti aurkitu behar baitu aplikatzeko bidea eta ordenamendu juridikoarekin bat egin behar du", zehaztu du.

Ekitaldian Idoia Otaegui UPV/EHUko Nazioarteko Zuzenbide Pribatuko albokoak eta ikastaroen zuzendarietako batek ere hitza hartu du.

UPV/EHU-KO UDA IKASTAROAK 

UPV/EHUko Uda Ikastaro”en esparruan antolatu dira 2021eko Vitoria-Gasteizko Nazioarteko Zuzenbideko eta Nazioarteko Harremanetako Ikastaro”ak eta, aurten, uztailaren 13tik 16ra, Zuzenbidearen eta Nazioarteko Harremanen esparruetako gaurkotasuneko edo eztabaidako gaiak jorratzen ari dira. Aurtengo edizioan, besteak beste, Giza Eskubideak arau-sistema gisa eta pandemia osteko nazioarteko harremanak lantzen ari dira. Egoera dela eta, aurten, udako ikastaro hau aurrez aurre egiten ari da, bai eta ZOOMen online zuzenekoaren bidez ere.

Oraindik ez dago iruzkinik
Iruzkinak itxita daude dokumentu honetan
Ekitaldiko kargudunak