Lehendakariordeak uste du "arduragabekeria" izango litzatekeela gobernuen arteko lankidetza haustea, krisitik ateratzeko bidea baita lankidetza hori

• Bizkaiko 2020-2023 Enplegu Planaren aurkezpenean, honako hau ziurtatu du: "Hori da ikasi dugun ikasgaia, lankidetzan aritzea, elkar osatzea, eztabaidatzea eta adostea"

Lehendakariorde eta Lan eta Enpleguko sailburu Idoia Mendiak adierazi du "arduragabekeria" izango litzatekeela gobernuen arteko lankidetza haustea, "norbaitek kate hori haustea"; izan ere, lankidetza horri esker ari gara krisitik ateratzen; esan duenez, "hori da ikasi dugun ikasgaia, lankidetzan aritzea eta elkar osatzea, eztabaidatzea eta adostea".

Mendiak Bizkaiko 2020-2023 Enplegu Planaren aurkezpenean parte hartu du gaur. Hitzordua Bilboko Iberdrola dorrean egin da, eta bertan izan dira Industria, Merkataritza eta Turismoko ministro Reyes Maroto, Bizkaiko diputatu nagusi Unai Rementeria eta Bizkaiko Enplegu, Gizarteratze eta Berdintasuneko diputatu Teresa Laespada.

Lehendakariordeak gogorarazi duenez, "gure ekonomia laurogei urtean jasan duen erasoaldi handienari aurre egiten ikusi dugu", eta nabarmendu du krisi honek utzi digun ikasgaia honako hau dela: "gaur irtenbide bat ikus badezakegu, hori administrazio publiko guztien baterako ahaleginagatik izan da, inoiz eduki dugun erronkarik handienaren aurrean inbertsio sozialak egitera bideratu dugun inbertsio handiagatik; eta gizarte-eragile guztien ahaleginagatik, elkarrizketa eta akordioa benetan gauzatu baitituzte". Izan ere, horrek baino ez du azaltzen, erantsi du, "gai izan garela iragarpenik okerrenei eusteko".

"Euskadin 68.000 lanpostu suntsituko zirela iragarri zen, eta eragin hori erdira mugatzea lortu genuen, batez ere ERTEen ondorioz. Hala ere, pandemiak aurretik eraman zituen enpleguen % 80 berreskuratu dugu jada, eta arautze babestuan egon direnen % 85 itzuli dira lanera, Euskadiren kasuan, diru-sarrera txikienak osatuz gainera", adierazi du.

Horregatik, bere ustez, "gure bereizgarri nagusiak erresistentzia eta berreskuratzeko gaitasuna dira", baina esan duenez "hona iristeko, lankidetza ere funtsezkoa izan da. Gobernuok aurrez aurre begiratzen jakin dugu, bizkarra eman beharrean, lankidetzan aritzen eta elkar osatzen jakin dugu, eztabaidatzen eta adosten jakin dugu, eta arduragabekeria litzateke norbaitek ikasgai hori ahaztea eta lankidetza-katea haustea".

Lehendakariordeak gaur aurkeztutako Bizkaiko Enplegu Plana aipatu du, eta adierazi du lurralde horrek "Udalen, Eusko Jaurlaritzaren eta Espainiako Gobernuaren sostengua duela bidezkoa eta berdintasunezkoa izan behar duen irtenbideari behin betiko bultzada emateko, enplegua gizarte-kohesiorako eta baterako aurrerapenerako faktore gisa hartzen duen irtenbide bati bultzada emateko. Eta gaur berresten dugun irudi honen bidez, Bizkaiko herritarrek datu ekonomikoez eta txertaketa-datuez haratago arrazoi bat dute etorkizunean konfiantza izateko: hemen gaudenok partekatutako konpromisoa dugu kogobernantza-bide horri jarraipena emateko".

Idoia Mendiak azpimarratu duenez, erakundeak "ez gaude hemen lehiatzeko, partekatzeko baizik". Bere saila Euskadi osoan enplegu-politikak zuzentzen dituen saila den arren, gogorarazi du "komunitate txiki bat garela eta ezin dugula ez bikoiztu ez elkarri aurka egin". Horregatik, honako hau erantsi du: "Plan honek Euskal Estrategian txertatu dugun jardunaren ikuspegi integrala jasotzen du. Hamarkada baterako begirada, legealdi batetik harago doana eta erakunde eta gizarte-eragile guztiekin lankidetzan egin duguna, eta talde politiko guztien ekarpenak jaso dituena".

Amaitzeko, honako hau adierazi du lehendakariordeak: "erronka itzela dugu, orain ez baita soilik langabezia-tasa jaistea, baizik eta langabezian trabatzen direnak, aukera gutxien dituztenak berreskuratzea, eta nortzuk diren badakigu: 45 urtetik gorakoak, emakumeak, gazteak eta dibertsitate funtzionala duten pertsonak. Erabateko berdintasunaren aldeko lana izugarria da, eta horretan buru-belarri dihardugu".