Beasaingo Udalak, CAFek eta URAk Oriako ur-goraldiei aurre egiteko lanen jarraipena egiteko batzordearen lehen bilera egin dute

2021-05-28
  • Uraren Euskal Agentziak aurrera egin du proiektua idazten, eta udazkenerako amaituta egongo dela aurreratu du, obra ahalik eta lasterren hasi ahal izateko
  • Ibaiaren ezkerreko ertzean, CAFerako sarreraren parean dauden eraikinak eraitsi egingo dira, ibilgua zabaltzeko, haren ahalmen hidraulikoa handitzeko eta Oria ibaiak ubidea gainezkatzeko aukerak murrizteko
  • Era berean, enpresara sartzeko zubi nagusia eta bulegoen arteko lotura-pasabide bat kenduko dira, eta ibaian gora zubi berri bat eraikiko da, ibilguak izango duen zabalera berriari egokitua
  • Ibaiaren ur-goraldiek herritarrei eta inguruko ondasunei eragindako kalteak saihestea ekarriko dute obrek, eta segurtasun-maila handitzeaz gain, eremuaren urbanizatzea ahalbidetuko dute, irisgarritasuna eta, oro har, zirkulazioa hobetuz 

Beasaingo Udalak, CAFek eta URAk Oriaren uholdeei aurre egiteko defentsa lanak jarraitzeko osatu berri den batzordearen lehen bilera egin dute, gaur Beasainen. Lehen bilera horretan, Beasaingo alkate Leire Artolak, CAFeko giza baliabideen zuzendari Gorka Zabalegik eta Uraren Euskal Agentziako zuzendari nagusi Antonio Aizek hartu dute parte. Bileran, CAF lantegiaren eta Beasaingo udalerriaren garapena zuzenean baldintzatzen duen erronka hidrauliko horri erantzuteko modu arin eta eraginkorrean lan egitea adostu dute hiru aldeek.

Oria ibaiaren ertzetan, Beasaingo C.A.F. industria-instalazioen parean dauden lursailak urpean gera daitezke, eta delako Uholde Arrisku Handiko Eremu batean bildu dira, uholdeei aurre egiteko plangintzari dagokionean. Hitzarmenaren ondorioz egingo diren obrek ibai-goraldiekiko segurtasun-maila nabarmen handituko dute CAFko azpiegituretan, zein inguruan bizi diren herritarrei ere. 2008an izan zen erasanak sortu zituen azkeneko goraldi-aurrekaria.

Jarraipen-batzordea 2020ko ekainean gai horri buruz sinatutako hiru aldetako hitzarmenean aurreikusitako jarduerak koordinatzeko eta bultzatzeko sortu da. Aurreikusitako lanek ekintza hauek barne hartzen ditu: J.M. Iturrioz kalean, Oria ibaiaren ezkerraldean dauden enpresaren eraikinak eraistea, CAFera sartzeko pasabidea eta zubia eraistea, inguruan ibilgua zabaltzea eta bideratzea, eta ondorioz sortuko den espazioa urbanizatzea. 

Ibaiaren ezkerraldean dauden industria-eraikinak eraisteko beharra — oztopo handia da uren joan-etorri askerako — ibilgua zabaltzeko beharraren ondorioz sortzen da; alegia, ibai-tartearen ahalmen hidraulikoa handitzeko eta, horrela, Oriak ohiko ibilgua gainezkatzeko probabilitatea nabarmen murrizteko. Ondorioz, ibilguarean zabaltzeak eraginda, oraingo bi zubiak ez deustu eta ordezkatzearen beharra Dakar. Hortaz, aurrekoen ordez, ibilgailu arinak eta oinezkoak CAFera sartzeko 40 metro inguruko argia izango duen zubi berri bat eraikitzea aurreikusten da; baita bulego-eraikin berri bat egitea eta prestatzea ere, operazioan eraitsiko direnak ordezkatzeko. 

3 milioi euroko inbertsio publiko eta pribatu globala eskatuko duten jarduketa-multzoa da, idazten ari diren proiektuaren behin betiko eraikuntza-xehetasunak gorabehera. URAk 530.000 € gorde ditu 2021ean bertan obran inbestitzeko parada egokituko balitz.

Segurtasuna eta inguruneari erantsitako balioa

CAFerako sarrera nagusia, "Porteria" bezala ezagutzen dena, inguru enblematikoa da udalerriarentzat. "Ingurua berrurbanizatzeak duela hamarkada batzuetatik ditugun uholde-arrisku arazoak errotik kentzea dakar, eta, beraz, pertsonen eta ondasunen segurtasunean irabaziko dugu", adierazi du Leire Artola alkateak. Gainera, ingurunearen irisgarritasuna hobetzeko aukera emango da, eta zirkulazioaren bi noranzkoak berreskuratuko dira, bidearen bi aldeetan espaloi zabalak jarrita. Ezkiaga auzoarentzat aurrerapauso bat izango da, zalantzarik gabe. URA-Uraren Euskal Agentziak lehen urratsa eman ondoren, Udalak baliabide guztiak jarriko ditu martxan eraispenak, urbanizazio proiektua eta obra berrien hasiera arintzeko. Aisialdirako gune berria erakargarri bihurtuko da, eta balio erantsia emango dio eremuari.

Konpromiso partekatuak

URA-Uraren Euskal Agentziak eraikuntza-proiektu osoa zehaztu eta mahaigaineratzeko konpromisoa hartu du. Lanen barruan sartzen dira eraikinak eraistea, egin beharreko obra hidraulikoak, proiektu horretan sartutako obrak kontratatzea, aipatutako obrak teknikoki zuzendu eta ikuskatzea, eta obren kontratazioaren benetako kostuaren % 50a finantzatu eta ordaintzea. Jarraipen batzordearen bileran, URAk azaldu du proiektua idazten jarraitzen dutela eta udazkenerako prest izango dutela behin betiko proiektua. Uraren Euskal Agentziak urteko azken hiruhilekorako lanak amaituta izan nahi ditu, lanak ahalik eta lasterren hasi ahal izateko.

Bestalde, Udalak konpromisoa hartzen du CAFen lursail eta jabetzetan aurreikusitako obra hidraulikoen ondoriozko eraginak erregularizatzeko beharrezkoak diren hirigintza-dokumentuak izapidetu eta onesteko (adibidez, eraikigarritasuna handitzea, eraitsiko diren eraikinen galera konpentsatzeko behar diren baldintzetan) eta obren kontratazioaren benetako kostuaren % 50a finantzatu eta ordaintzeko.

Azkenik, CAFek konpromisoa hartzen du bere jabetzakoak diren eta proiektatutako obra hidraulikoen eraginpean dauden Oria ibaiaren ezkerreko ertzean dauden lursail eta eraikinak Uraren Euskal Agentziaren esku jartzeko. URAk obra zehatzak — idazten ari den eraikuntza-proiektuan zehaztuko direnak — lizitatzeko, lursailak aldez aurretik xedatu behar dira. Era berean, CAFek bere gain hartuko du obrek ukitutako eraikinak ordezkatuko dituzten bere bulego berriak gaitzeko obrak exekutatzeko eta ordaintzeko ardura.

2 iruzkin
  • 2021-05-30

    Iraungitze-data duten etxebizitza-parke asko zahartuta dituzten etxebizitzen prezioarekin espekulatzen da, eta klimaren fenomenoen mehatxuek kalteak eragin ditzakete, belaunaldien artean ordaindu beharreko zorra gizenduz. Badirudi urte asko leku batean bizitzeak ez duela bermatzen etorkizunean pertsona kanporatua ez izatea, bizipen-berme faltagatik. Adibidez, pertsona batzuek pribilegioak izatea eta beste batzuek ez kidetasunaren arabera, eta beste gauza batzuk, adibidez. Izan ere, oraindik ere dirua agintzen du etekinak edozein preziotan bilatzeko, balioa ere kontuan hartu gabe.

  • 2021-05-30

    Se especula con el precio de vivienda con mucho parque de viviendas envejecido con fecha de caducidad y la amenaza de fenómenos del clima pueden causar destrozos pasan factura engordando la deuda a pagar entre generaciones. Parece que vivir muchos años en un lugar no garantiza no ser persona expulsada en un futuro por falta de garantías vivencias le toque vivir. Como que haya personas con privilegios y otras no según afinidad y otras cosas por ejemplo. Como que sigue todavía mandando don dinero buscar beneficios a cualquier precio sin considerar siquiera el valor.

Iruzkinak itxita daude dokumentu honetan
Komunikabideek behera kargatzeko
Ekitaldiko kargudunak
Beste gonbidatu batzuk
  • Leire Artola Beasaingo alkatea; Gorka Zabalegi CAFeko giza baliabideen zuzendaria