Berriak Osasuna

Osasun Sailak eguneratu egin du jarduera sozioekonomikoetan COVID-19-aren transmisioa prebenitzeko protokoloak prestatzeko gida

2021-05-21

23/2021 Dekretuan ezarritakoaren arabera protokoloa behar duten jardueretarako neurriak finkatzen dira; alegia, zeremonietarako, musika- eta ahots-taldeen eta dantza ez-profesionalen entsegu eta emanaldietarako, aisialdiko jardueretarako eta federazio-egituratik kanpoko kirol-probetarako

Aire zabaleko espazioetan gomendatzen den erabilera, edukieraren kontrola eta parte-hartzaileen arteko distantzia dira praktikan jarri beharreko baterako urrats batzuk

Osasun Sailak eguneratu egin du COVID-19aren transmisioa prebenitzeko protokoloak prestatzeko gida, eta jarraibide bereziak ezarri ditu zenbait jardueratarako, besteak beste: zeremoniak, musika- eta ahots-taldeen eta dantza ez-profesionalen entsegu eta emanaldiak, aisialdiko jarduerak eta federazio-egituratik kanpoko kirol-probak. 23/2021 Dekretuak jarduera horietarako Osasun Publikoaren Zuzendaritzaren jarraibideak betetzen dituzten protokoloak exijitzen ditu.

Egungo pandemia-egoeran, koronabirusaren transmisioa murrizteko prebentzio-neurriak aplikatzen jarraitu behar da. Horretarako, jarduera horiek antolatzen dituzten erakundeek prebentzio-protokoloak izan behar dituzte. Oro har, protokolo guztiek aurreikusiko dituzte honako neurri hauek: edukierak kontrolatzea; pilaketarik ez egoteko sarbideak antolatu eta kudeatzea; kutsapenak zein egoeratan gerta daitezkeen identifikatzeko jarduera aztertzea; parte-hartzaileei bete behar diren neurriei buruzko aurretiko informazioa ematea, eta, jakina, COVID-19arekin bateragarriak diren pertsona baten aurrean jarduteko urratsak, bai eta kontaktuentzako jarduketa-urratsak ere.

Nobedade nagusia da dokumentuak prebentzio-neurri espezifiko batzuk zehazten dituela, aurretik aipatutako jardueretara egokituak, zeinek birusa transmititzeko bide esanguratsuenetan baitute eragina. Besteak beste, honako hauek zehazten dira: ahal dela, aire zabaleko espazioak erabiltzea; kontaktu-kopurua murriztea eta, horretarako, elkarrekin nahastuko ez diren pertsona-taldeak antolatzea, eta parte-hartzaileen arteko pertsonen arteko distantzia gordetzea. Osasun Sailak prestatu duen dokumentuak, gainera, kutsapenak prebenitzeko oinarrizko neurriak gogorarazten ditu, hala nola maskara erabiltzea, barne-espazioak aireztatzea, eskuak garbitzea eta azalerak garbitu eta desinfektatzea.

COVID-19aren transmisioa prebenitzeko protokolo eta planak prestatzeko Osasun Publikoaren jarraibideak jarraian zehazten den estekan daude, eta edozein erakunderen esku daude, haietan oinarrituz protokoloak presta ditzaten.

 

Vitoria-Gasteiz, 2021eko maiatzaren 21a

Oraindik ez dago iruzkinik
Iruzkinak itxita daude dokumentu honetan
Ekitaldiko kargudunak
Beste gonbidatu batzuk
  • Koldo Cambra, Osasun Publikoaren eta Adikzioen zuzendariordea