Berriak Segurtasuna

Ertzaintzak nahita eragin zituzten eta makinarian milioi eta erdi eurotik gorako kalteak egin zituzten suteak argitu ditu

2021-05-03
  • Bost atxilotu eta ikertu bat, Hernaniko Ertzain-etxeak urtebetez egin duen ikerketaren ondoren.
  • 2020ko otsailean eta martxoan hiru sute izan ziren enpresa ezberdinen makinak zituzten Hernaniko eta Astigarragako pabiloietan eta barrutietan.
  • Nahita eragindako suteen arrazoia, dirudienez, hondakin solido ez-organikoen tratamenduarekin zerikusia zuten enpresei kalte egitea zen.
  • Ikerketen arabera, atxilotuetako batek eskatu eta ordaindu zien beste inplikatuei sabotajeak egiteko.

Hernaniko Ertzain-etxeko ikerketa taldeak hainbat enpresaren makinen aurkako hiru sabotaje-ekintza argitu ditu. Makinei kalte larriak egin zizkieten 2020 urtearen hasieran nahita eragindako suteek. Gertaerak argitzeko polizia-lana urtebetean luzatu da. Nahita eragindako hiru suteek egindako kalteak 1.500.000 euro inguruan baloratu ziren.

Lehenengo delitu-egintza 2020ko otsailaren 26koa da. Egun horretan, gauerdi inguruan, sute bat sortu zen Hernaniko udal-barrutiko instalazio batzuetan zeuden makinetan.

Lekuan bertan egindako begi-ikuskapenean argi geratu zen sua nahita eragin zutela. Ertzaintzak gasolina-hondarrak zituzten botilak eta barbakoa-pastillen hondarrak (ustez sua hasteko erabili zituztenak), eskularruak eta instalazioetako makinak eta ibilgailuak erregaiarekin bustitzeko erabili ahal izan zituzten jostailuzko uretako pistolak aurkitu zituen inguruan. Delitugileek makinetako eserlekuetako aparra atera eta agerian utzi zuten sua errazago heda zedin.

Handik egun batzuetara, martxoaren 2an, kasu honetan bazkalorduan, langilerik ez zegoenean, modus operandi bera errepikatu zen Hernanin nahita eragindako beste sute batean. Kasu honetan hainbat enpresak makina astunak gordetzen zituzten barruti batean izan zen sutea. Kasu honetan ere kalteak handiak izan ziren, eta ikerketak eta hondarren eta ebidentzien analisiak egiaztatu zuten hainbat pertsona sartu zirela barrutian gaiztakeria egitera.

Baina hura ez zen azkeneko erasoa izan. 2020ko martxoaren 15ean antzeko gertaera bat jasan zuen enpresa batek, eta kasu honetan Astigarragako instalazio batzuetan eman zieten sua makinei. Delitugileek berriz ere gasolinaz busti zituzten makinak eta kamioiak, horien artean dunper bat, pala kargatzaile bat, atzerako hondeamakina bat, beste kamioi baten kabina bat…, guztira bederatzi ibilgailu kaltetu zituzten. Ikerketaren arabera, hiru suteak lotuta zeuden, bai kaltea jasan zuten enpresak zein motatakoak ziren kontuan hartuta bai delitugileen jarduteko modua ikusita.

Analisia eta ikerketa Donostiako 4. Epaitegiarekin koordinatuta

Kasuaz arduratu ziren ertzainak gaur arte luzatu diren eginbideak instruitzen hasi ziren. Donostiako 4. Instrukzio Epaitegiarekin lankidetzan, ikerketa-baliabideak egokitu ziren ibilgailuak, pertsonak, kokapenak eta ordutegiak aztertzeko eta sabotajeen atzean nor egon zitekeen jakin ahal izateko.

Ikerketan zehar Hernaniko Ertzain-etxeko ikertzaile taldeak bildutako informazioa aztertuta, ondorioztatu zen erasoen atzean egon zitekeen arrazoiak hondakin ez-organikoen tratamenduan lan egiten zuten enpresekin izan zezakeela zerikusia.  

Ikertzaileen susmo nagusia izan da orain atxilotu duten pertsonetako bat jabetzaren aurkako delitu-historia luzea zuen gizon batekin harremanetan jarri zela adierazitako erasoak egin zitzan. Azken horrek, dirudienez, onartu egin zuen proposamena, eta, bere inguruko beste pertsona batzuekin batera, hiru suteen egile materiala izan zen. Ikerketaren arabera, sute bakoitza lau gizonezkok eragin zuten, eta kasu bakoitzean auto bat erabili zuten mugitzeko.

Ertzaintzaren lanean oinarrituta pertsona horiek atxilotzeko operatibo bat jarri zen martxan, eta atxiloketak apirilaren 20an eta 21ean egin zituzten Andoainen eta Urnietan. Agenteek guztira bost pertsona atxilotu zituzten, eta seigarren bat ere ikertu zuten sute bidez kalte-delitu batean parte hartzea eta talde kriminaleko kide izatea leporatuta.

Arrastatuetako lau euren barruti judizialetako epaitegien, zehazki Donostiako eta Tolosako epaitegien, aurrera eraman zituzten, eta bosgarrena aurretik aske utzi zuten. Akusatu guztiak aske geratu ziren karguak egotzita.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko