Muskiz, Euskadiko Larrialdietako Zerbitzuek harkaitzetan harrapatuta zeuden hiru gazte erreskatatu dituzte

•  Ertzaintzaren helikoptero batek Muskizen, marea igo denean, harkaitzetan harrapatuta geratu diren hiru gazte erreskatatu ditu gaur, asteartea, arratsaldean.

Gaur arratsaldeko sei eta erdiak inguruan, larrialdiei aurre egiteko SOS DEIAK 112 zerbitzura deitu dute Muskizen, Pobeña auzoan, hiru pertsona harkaitzetan harrapatuta zeudela esanez. Dirudienez, marea igo denean geratu dira harrapatuta, eta ezin ziren euren kabuz irten.

Dispositiboaren arduradunak larrialdietako hainbat baliabide mobilizatu ditu, eta, azkenean, Ertzaintzaren helikoptero batek eta Zaintza eta Erreskate Unitateko agenteek erreskatatu dituzte hiru gazteak; hirurak onik zeuden.