Berriak Segurtasuna

Santurtzi, bi atxilotu agentearen aurkako atentatua eta desordena publikoak leporatuta

2021-01-24

Donostian eta Pasaian ere gertatu ziren istiluak

Ertzainek 44 urteko gizon bat atxilotu zuten atzo, larunbata, gauean, Santurtzin, atentatua eta lesioak eragitea leporatuta, eta beste 34 urteko bat bide-segurtasunaren kontrako delitua eta desordena publikoak leporatuta. Arrastatuek Santurtzin gertatutako istiluetan parte hartu zuten, eta horietan bi ertzain zauritu ziren eta osasun-laguntza behar izan zuten. Bestalde, atzo, larunbata, arratsaldean, istiluak gertatu ziren Gipuzkoako hiriburuan, eta hainbat pertsonak botilak eta petardoak bota zizkieten Ertzaintzaren patruilei. Pasaian ere polizia-dotazioei aurre egin zieten botiloi batean parte hartzen ari zirenek, eta edukiontzi bati su ere eman zioten.

 

Atzo gaueko bederatzi eta erdiak aldera, Mamarigan herritarrak babesteko lanetan ari zen patruila batek 30 bat pertsona ikusi zituen elkartuta, eta horietako batzuek zegokion maskara jantzi gabe zutela eta segurtasun-tartea ez zutela errespetatzen ziurtatu zuten, Covid-19ari aurre egiteko osasun-neurriak urratuz. Halako batean errepidearen zati bat okupatzen hasi ziren pertsonei eta ibilgailuei pasabidea oztopatuz, eta, gainera, polizia-dotazioari oihuka eta irainak esaten hasi ziren.  Agenteek esku hartu zuten bidetik erretira zitezen, eta identifikatzen hasi zirenean inguratu egin zituzten eta jende gehiago hurbildu zen. Jarraian, bortxaz eraso egin zieten, eta bi agente zauritu egin zituzten, eta osasun-zentroetan artatu behar izan zituzten. Horietako batek sutura behar izan du barailean, eta kolpeak zituen gorputzean. Bigarrenari besoa ibilgetzeko ferula bat jarri diote. Lekura beste polizia-batzuk iritsi zirenean kontrolatu ahal izan zuen Ertzaintzak egoera, eta ustezko erasotzaileetako bat atxilotu zuen agentearen aurkako atentatua eta lesioak eragitea leporatuta.

Une horretan, eta laguntzako patruilak istilua gertatzen ari zen lekura hurbiltzen ari zirenean, Mamarigarako bidean, Iparragirre kalean gidari batek autoa gurutzatu zuen polizia-autoen aurrean, pasa ez zitezen eta aipatutako agenteei eraso egiten ari ziren lekura iristerik izan ez zezaten. Gidaria ere atxilotu egin zuten bide-segurtasunaren eta desordena publikoen delituak leporatuta.

Bi atxilotuak polizia-eginbideak amaitutakoan jarriko dituzte agintari judizialaren eskuetan.

Istiluak Donostian eta Pasaian

Atzo arratsaldeko zortzietatik aurrera, koronabirusaren pandemiari aurre egiteko osasun-araudia betearazten saiatzeko Ertzaintzak abian jarri zuen prebentziozko dispositibo batek esku hartu behar izan zuen Donostiako Alde Zaharreko kaleetan hainbat pertsona elkartuta zeudelako, eta agenteei botilak eta material piroteknikoa bota zizkieten. Aipatu behar da sare sozialen bidez botiloia deituta zegoela Trinitate Plazan. Guztira bederatzi pertsona identifikatu zituzten istiluetan, eta gaueko hamarrak aldera amaitu ziren.

Pasaian ere gaueko bederatziak baino lehentxeago, jakin zen hogei bat pertsona botiloia egiten ari zirela plaza batean. Ertzaintzaren patruilak irain artean hartu zituzten, eta botilak ere bota zizkieten. Gainera, edukiontzi bati su eman zioten.  Gaueko 22:30 aldera normaldu zen egoera.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko