Berriak Segurtasuna

Ertzaintzak adingabe bat atxilotu du Arrasaten, Gipuzkoako adingabeen zentro batetik lapurtutako furgonetarekin ihesi zihoala

2021-01-19

Ertzaintzak adingabe bat atxilotu zuen atzo gauean Arrasaten, Gipuzkoako Oarsoaldea eskualdean dagoen eta bizileku duen adingabeen zentro batetik lapurtu zuen furgoneta batean, Ertzaintzak atzetik zituela, ihesi zihoala.

 

Atzo gaueko 23:30 aldera, Oarsoaldea eskualdean dagoen adingabeen zentro batean bizi den 17 urteko adingabe batek kutxa gotor bat behartu zuen bihurkin batekin zentroko bi hezitzaile mehatxatu eta beldurtu ondoren, eta 176 euro, telefono bat eta zentroko furgoneta baten giltzak hartu zituen.

Gaztea abiadura handian abiatu zen furgonetan AP-8 autobidetik Bilborako norabidean, Zarauzko ordainlekuko barrerak hautsita. Ihesi zihoala, arriskua sortuz zirkulatu zuen 170 km/h abiadura ere iritsiz, eta ez zien patruilen argi eta soinu seinaleei jaramonik egin. Bergaran gelditu gabe igaro zuen AP-1 autobideko ordainlekua, eta berriz ere barrera aurretik eraman zuen.

Goizaldeko ordu bata aldera Arrasaten geldiarazi ahal izan zuen Ertzaintzak furgoneta, eta agenteek gidariari gorputz-miaketa egin ziotenean adingabeen zentroan lapurtutako dirua, bihurkin bat eta hiru telefono mugikor aurkitu zizkioten, horietako bat zentrokoa. Gidaria atxilotu egin zuten, eta indarkeria eta beldurra erabiliz lapurreta egitea, ibilgailua erabiltzeko ebastea, arriskua sortuz gidatzea eta kalteak egitea leporatu zizkioten.

Atxilotua polizia-egoitzara eraman zuten zegozkion eginbideei hasiera emateko, eta gaur goizean zehar jarriko dute Donostiako Adingabeen Fiskaltzaren eskuetan.

 

 

 

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko