Berriak Segurtasuna

Igorren atxilotu dute enpresa batean lapurreta egin nahian ari zela

2020-12-07

Ertzainek 50 urteko emakume bat atxilotu zuten atzo, igandea, arratsaldean, Igorren, bertako enpresa batean metal-lingoteak lapurtzen harrapatu ondoren.

Atzo arratsaldeko zazpi eta erdiak aldera, herritarren segurtasunerako patruila bat Igorreko San Juan auzoan dagoen enpresa batera hurbildu zen, pertsona batek ohartarazi ondoren hainbat pertsona barruan lapurretan ari zitezkeela. Enpresara iritsi zirenean, agenteek furgoneta bat ikusi zuten aurrean aparkatuta, eta barruan emakume bat telefonoz hizketan eta zelatan. Agenteek ikusi zuten une horretan, haiek ikusi zituztenean, hainbat pertsona atera zirela pabiloitik korrika, eta begien bistatik galdu zituzten eta ezin izan zituzten geldiarazi.

Susmagarria identifikatu egin zuten, eta jakin zuten polizia-aurrekari ugari zituela. Gero egiaztatu zuten matrikula-plakak estalita zituen beste furgoneta bat zegoela enpresa barruan aparkatuta, eta horren barruan ibilgailuaren dokumentazioa aurkitu zuten. Pabiloia ikuskatu zutenean, agenteek ziurtatu zuten ateak behartuta zeudela, eta, gainera, 800 metal-lingote aurkitu zituzten pilatuta, ustez lapurtzeko asmoz.

Horren aurrean, agenteek atxilotu egin zuten 50 urteko emakumea indarra erabiliz lapurreta egitea leporatuta, eta polizia-egoitzara eraman zuten agintari judizialaren esku utzi aurretik beharrezko izapideak egitera.

Ertzaintzak zabalik du ikerketa, ihes egin zuten gainerako inplikatuen identitatea ziurtatu ahal izateko.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko