Berriak Segurtasuna

Irun, edanda zihoan gidari bat atxilotu dute modu irregularrean gidatzen harrapatu ondoren

2020-12-01

Ertzaintzak 20 urteko gidari bat atxilotu du goizaldean Irunen, herrigunean arriskua sortuz gidatzeagatik eta gero egindako alkoholemia-proban positibo emateagatik.

 

Irungo Ertzaintzaren patruila batek auto bat ikusi du goizaldean Irungo herrigunean argiak piztu gabe zirkulatzen. Agenteek gelditzeko agindu diote argi eta soinu seinaleen bidez, baina gidariak ez die jaramonik egin eta, gainera, maniobra arriskutsu bat egin du. Gidariak biribilgunean jira egin du eta kontrako noranzkoan zirkulatu du ihes egiteko asmoz, eta patruila, beraz, bere aurrean gurutzatu behar izan da autoa geldiarazteko.

 

Agenteek ikusi dute autoaren gidariak alkoholdun edarien eraginpean egotearen sintoma argiak zituela, eta atxilotu egin dute, beraz, bide-segurtasunaren aurkako delitua leporatuta. Autoa miatu dutenean, agenteek graduazio altuko edari alkoholdunen hainbat botila eta ustez sorgorgarriak ziren substantziak aurkitu eta kendu dizkiote.

 

Gaztea polizia-egoitzara eraman dute dagozkion izapideak egitera. Alkohola hautemateko probak egin dizkiotenean, atxilotuak 0,59 miligramo alkoholeko tasak eman ditu botatako aire litroko.

 

Atxilotua gaur goizean zehar utziko dute agintari judizialaren esku Irungo Guardiako Epaitegian. 

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko