URAk Mallabiko hondakin-urak Elgoibarko Apraizko araztegira lotzeko lanak hasi ditu

2020-11-05

Uraren Euskal Agentziak (Eusko Jaurlaritzako Ekonomiaren Garapen, Iraunkortasun eta Ingurumen Sailari atxikita dago) Mallabiko hondakin-urak Elgoibarko Apraizko araztegira eramateko obrak hasi ditu. Araztegi hori Gipuzkoako Ur Kontsortzioak kudeatzen du.

Eskualdeko saneamendua hobetzeko proiektuaren mugarrietako bat da. Ermuko eta Mallabiko hondakin-urak bildu eta Apraizko araztegira bideratuko dira, behar bezala tratatzeko. Horri esker, Ego ibaiko karga kutsatzailea nabarmen murriztuko da eta ibaiaren egoera ekologiko ona berreskuratzea sustatuko da. Jarduketak 8 hilabeteko egikaritze-epea du, eta 1.000.000 euroko inbertsioa.

Gaur egun, Mallabiko udalerriko erdiguneko saneamendua kolektore batzuen eta ordeztu egingo den 90eko hamarkadako hondakin-uren araztegi baten inguruan egituratzen da. Hori dela-eta, ponpaketa-estazio berri bat eraiki beharko da – 15 l/s-ko bultzatze-ahalmenarekin, etorkizunean 30 l/s-ra handitu daitekeena –, egungo HUAren ondoan kokatuta, hondakin-urak bultzatzeko eta kota-aldea gainditzeko Urtiaga Hiribideraino, handik grabitatez igaroko baitira.

Halaber, bulkatzeko hodi bat eraikiko da, guztira 116,05 metro linealeko luzera izango duena, bai eta kolektore-sare berri bat ere, 315 mm-ko diametroko hodiak dituena zanga mota desberdinetan kokatuta.

Hasi berri diren jarduketa horiek guztiak honako isurketen konexio hauek aurreikusiz diseinatu dira: Betearte zabortegiko lixibiatuak – Kolektorera isuri aurretik aurretratamendu bat beharko dutenak –, Areitio gainean egingo diren poligono berrietakoak eta Eibar Kirol Elkartearen etorkizuneko instalazioetakoak.

Oraindik ez dago iruzkinik
Iruzkinak itxita daude dokumentu honetan
Ekitaldiko kargudunak