Berriak Enplegua eta Gizarte Politikak

Kalteberatasun-egoeran dauden pertsonen enpleguak, 2019an, % 19 gora egin du GIZATEAren inguruan, eta, hala, azken 4 urteotako joera positiboari eutsi zaio

2020.eko ekainak 22
  • GIZATEAko presidenta den Mari Jose Rodrigok, Leire Álvarez de Eulate kudeatzailea, eta Beatriz Artolazabal Sailburuarekin batera, GIZATEAren memoria soziala, gizarteratzeko eta laneratzeko enpresen datu nagusiak eta COVID-19aren krisialdian etorkizunerako dituen erronkak aurkeztu ditu
  • GIZATEA Gizarteratzeko eta Laneratzeko Euskadiko Enpresen Elkarteak Eusko Jaurlaritzaren babesa du; elkarteak kalteberatasun-egoeran dauden pertsonen gizarte- eta lan-inklusioaren alde lan egiten du
  • Kalteberatasun-egoeran dauden pertsonen enpleguak % 19 egin du gora 2019an, eta 836 langile dira; laneratze-enplegu gehien sortu den urtea izan da. Enplegu horien % 61 emakumeek betetzen dute
  • Laneratze-ibilbidea 2019an amaitu zuten pertsonen % 63 enplegu arruntean sartu ziren

Vitoria Gasteiz, 20-06-22 

María José Rodrigo GIZATEA - Gizarteratzeko eta Laneratzeko Euskadiko Enpresen Elkarteko presidenteak honako hau esan du: “gizarteratzeko enpresetan lan egin eta ibilbidea 2019an amaitu duten pertsonen % 63 lan-merkatu arruntean sartu dira. Kalteberatasun-egoeran dauden pertsonen enpleguak % 19 egin du gora 2018an. Laneratzeko enpresetako 836 langile edo 1.368 enplegu, guztira, enplegu arruntak ere kontuan hartzen baditugu. Horrek guztiak gizarte-kohesio handiagoa erakusten du”.

“Zifra horien atzetik pertsonak daude, eta zailtasun gehien duten pertsonentzat azken 4 urteotan enplegua sortzeko izan den joera positiboak gizarte-inklusio eta -kohesio handiagoa dakar. Eusko Jaurlaritzak sektoreari ematen dion laguntza funtsezkoa da, eta bereziki beharrezkoa COVID19ak eragindako osasun-krisiaren egungo egoeran eta epe ertainera ekonomiaren eta enpleguaren bilakaeraren inguruan dagoen ziurgabetasun-egoeran”, esan du Rodrigok.

María José Rodrigorekin eta Leire Álvarez de Eulate GIZATEAko presidentearekin eta kudeatzailearekin batera, Beatriz Artolazabalek 2019ko GIZATEAren memoria soziala aurkeztu du. Artolazabalek dioenez, “2019ko datuek erakusten dute hazten ari den sektorea dela, eta Euskadi kohesionatuagoa izaten laguntzen duela. GIZATEA eratzen duten enpresen datuek jardueraren balantze ona eskaintzen dute; zifrek egiaztatzen dute kalteberatasun-egoeran dauden pertsonen lan-inklusioa lortzeko bide egokitik goazela. Hala ere, egungo egoeran, COVID-19ak eragindako krisialdi honetan, elkarrekin lanean jarraitu behar dugu, krisi honek sektorean eta, ondorioz, pertsona kalteberenengan izan dezakeen inpaktua arintzeko”

Aukerak

GIZATEA-Gizarteratzeko eta Laneratzeko Euskadiko Enpresen Elkarteak 43 enpresa batzen ditu; enpresa horien helburua da enplegu-aukerak sortzea gizarte-bazterketa egoeran edo arriskuan dauden pertsonentzat. Datu horiek, laugarren urtez jarraian, 2008ko krisialdiaren urterik latzenen ondoren, bilakaera positibo argia erakusten dute ekonomia- eta gizarte-adierazle nagusietan.

Enpresa horiek, 2019an, 1.368 enplegu sortu zituzten; haietatik, 836 (% 61) laneratzeko enpleguak izan ziren. Laneratzeko enplegu gehien sortu den urtea izan da. Gizateako enpresa bazkideak erreferentea dira Estatu-eremuan; Estatuko laneratzeko enpresetako enpleguaren % 25 baino gehiago kontzentratzen dute.

“Gure helburu nagusia da kalteberatasun-egoeran dauden pertsonen enplegagarritasuna eta bizi-kalitatea hobetzea, eta, horretarako, pertsonekin ez ezik, gizartearekin ere lan egiten dugu, oro har: erakundeak, gizarte-eragileak, enpresak eta unibertsitateak, lan-ingurune inklusiboak sustatzeko, pertsona guztientzako aukerak eskaintzen dituztenak”, azpimarratu du Gizateako presidenteak prentsaurrekoan. “Eta hori guztia elkarlanaren eta sareko lanaren bidez egiten dugu”

GIZATEAk enpresa-sektore arruntaren sentsibilizazio-lana egiten du, aliantzak sortzeko eta elkarlanerako aukerak detektatzeko, eta haiek, aldi berean, laneratzeko dauden enpresetan lanpostu berriak sortzeko, enpresa berriak sortzeko eta enplegu arruntera igarotzen den pertsona-kopurua eta kalitatea areagotzeko aukera eman dezaten.

2019an, laneratzeko euskal enpresetan ibilbidea amaitu zuten pertsonen % 63 enplegu arruntera sartu ziren; datu horrek erakusten du laneratzeko enpresak laneratzeko tasa altuenak dituzten enplegu-politiken tresnetako bat direla.

Datu ekonomikoak direla eta, laneratzeko euskal enpresek 2019an diru-sarrerak handitu dituzte; 32 milioi euro baino gehiago izan dituzte, eta, haietatik, 23 milioi ondasun edo zerbitzuen fakturazioaren ondoriozkoak izan dira, nagusiki bezero pribatuei eginikoa (% 77) eta % 23 sektore publikoari eginikoa. Sektore publikoari eginiko ehuneko hori % 5 areagotu da azken urtean.

Inbertsioen itzulkina

Gainera, laneratzeko enpresen elementu bereizgarri bat, egungo enplegu-politika aktiboen tresnei eta pobreziaren aurkako beste borroka-mekanismo batzuei dagokienez, honako hau da: ez dituzte funts galdurako baliabide ekonomikoak kontsumitzen; inbertsio publikoak gizartearentzako itzulera eragiten du, bai zerga-mailakoa (jarduera ekonomikoaren gaineko zergaren bidez, PFEZ), bai ekonomia-mailakoa (langabezian egon eta prestazioak jasotzen dituen pertsona-kopurua murriztuz eta ekonomia dinamizatuz), bai kohesioaren eta gizarte-justiziaren terminoetakoa. Hala, 2019an, laneratzeko postu bakoitzeko itzulera 8.970,43 €-koa izan zen. Termino orokorretan, Gizateari elkartutako laneratzeko euskal enpresetan laneratzeko postuen itzulera, guztira, 2.593.268,71 eurokoa izan zen, 2019an.

Laneratze-enpresak irabazi-asmorik gabeko ekimen ekonomikoak dira; enpleguaren eta gizarte-inklusioaren eremuan espezializatuta dauden erakundeek bultzatu ohi dituzte. GIZATEAko arduradunek azaldu bezala, merkatuan beste edozein enpresa gisa dihardute, eta gizarte- eta prestakuntza-laguntzako ibilbide pertsonalizatuaren bidez –gehienez hiru urteko iraupena–, gizarte-bazterketarako arriskuan dauden langabeen enplegagarritasuna hobetzen dute eta horiek laneratzea eta gizarteratzea lortzen dute.

Iruzkin bat
  • 2020.eko ekainak 23

    Impulsar más plataformas de consumo local con apoyo público privado estudiando fórmulas minimización consumo energético y con lenguaje código no copiable aleatorio aunque son momentos se precisa de colaboración internacional emergencia climática

Iruzkinak itxita daude dokumentu honetan
Komunikabideek behera kargatzeko
Ekitaldiko kargudunak
Beste gonbidatu batzuk
  • Mari José Rodrigo, Gizatearen lehendakaria; Leire Alvarez de Eulate, Gizatearen zuzendaria;