Berriak Kultura eta Hizkuntza Politika

Eusko Jaurlaritzak abian jarritako kultur eragileentzako aholkularitza zerbitzuak 461 kontsulta jaso ditu hilabetean

2020-05-28
  • Kontsulta gehien izan dituen sektoreak antzerkiarena (153), ikus-entzunezkoena (146) eta musikarena (125) izan dira.

 

Gasteiz, 2020/05/28       

Eusko Jaurlaritzak abian jarritako kultur eragileentzako aholkularitza zerbitzuak 461 kontsulta jaso ditu duela hilabete martxan jarri zenetik, eta kontsulta horien ia erdia (% 47,5) langile autonomoek egin dituzte. Kontsulta gehien jaso dituen sektoreak antzerkiarena (153), ikus-entzunezkoena (146) eta musikarena (125) izan dira. Gainera, kontsulten % 95,4 lotuta egon dira administrazioek abian jarritako laguntza eta prestazioekin Covid 19ren krisiak kulturaren munduan izan dituen ondorioak arintzeko.

Eusko Jaurlaritzako Kultura eta Hizkuntza Politika Sailak kultura-arloko langileei zuzendutako aholkularitza-zerbitzu hau abian jarri zuen apirilaren 24an, Covid 19ren krisiaren ondorioei aurre egiteko bultzatutako laguntza eta neurriei buruzko informazio guztia errazteko. Zerbitzua Kulturklik Pro plataformaren bidez eskaintzen da (kulturklik.euskadi.eus/asesoria /), eta, gainera, kultura-sektore desberdinetako profesionalei eta eragileei zuzendutako bi gida eskaintzen dira.

Kontsultak egin dituzten herritarren % 47 inguru autonomoak dira, eta besteren konturako langileak, berriz, ia % 25. Halaber, % 8 beste batzuen kategorian kokatu dira, eta beste % 8 sozietate mugatu gisa. "Beste batzuk" kategoriaren barruan daude, adibidez, azken hilabeteetan inolako diru-sarrerarik izan ez duten pertsonak, besteren kontura edo autonomoen erregimenean kotizatzen ari ez direnak eta arazo gehigarriak izan ditzaketenak (etxea uztea).

Sektoreak

Sektore kulturalei erreparatuz gero, ikus daiteke antzerkia (% 33), ikus-entzunezkoa (% 32 inguru) eta musika (% 27) direla sektore erreferentziatuenak. Nabarmen atzerago daude arte bisualak (% 11,9), dantza (% 11, 5) eta liburua eta literatura (% 6,9). Halaber, kulturaren balio-kateari dagokionez, honako hauek dira erreferentziatuenak, hurrenez hurren: sorkuntza (% 56), ekoizpena (% 35), erakusketa (% 24) eta prestakuntza (% 22).

Kontsulten arrazoi zehatzei dagokienez, gehienek laguntzak eta prestazioak izapidetzearekin dute zerikusia (% 95), eta zalantza ohikoenak Jarduera Ekonomikoen gaineko Zergaren epigrafeen ingurukoak dira (% 26,5), laguntza-lerroen bateragarritasunaren ingurukoak (% 23,5) edo, besterik gabe, kulturarako laguntza espezifikoei buruzko informazio orokorra eskatzen da (% 19,1). Azken astean, kontsulten % 73k zerikusia izan dute, zehazki, Eusko Jaurlaritzak kulturako langileei eskainitako laguntzekin.

Hizkuntza eta generoa

Kontsultak bideratzeko erabili den hizkuntzari dagokionez, % 34k kontsulta euskaraz kudeatzeko eskatu dute, eta % 66k gaztelaniaz kudeatzeko. Generoari erreparatuz, zerbitzuaren funtzionamenduko 5 asteetan, kontsulta horien % 48 gizonek egin dituzte, eta % 46 emakumeek. Halaber, 7 pertsonak, guztizkoaren % 1,5 ‘ez-bitarra’ dela adierazi dute, eta 18 lagunek (% 3,9) ez dute erantzun.

Azkenik, kontsulten jatorriari erreparatuta, kontsulten % 49 Bizkaian lan egiten duten edo bizi diren pertsonek eta erakundeek igorri dituzte; kontsulten % 38 Gipuzkoatik iritsi dira. Azkenik, kontsulten % 12 inguru Arabatik egin dituzte. Laugarren eta bosgarren asteen artean, behera egin dute, ehunekotan, Bizkaiko eta Gipuzkoako agenteek egindako kontsultek, eta gora, berriz, Arabakoak.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko
Ekitaldiko kargudunak
(XI legealdia 2016 - 2020)