Berriak Osasuna
Eu

Eusko Jaurlaritzak Bizkaiko eta Gipuzkoako ikastetxe guztietara zabaldu du eskolen aldi baterako etetea, Euskadin koronabirusaren hedapena geldiarazteko

2020.eko martxoak 12

EAEk beste 85 COVID-19 kasu erregistratu ditu; beraz, kutsatutakoak guztira 346 dira, eta hildakoak 11  

Osasuneko eta Hezkuntzako sailburuek lasaitasun-mezua zabaldu dute haurrak osasuntsu daudelako, baina birusa biztanleria kalteberari transmititzea saihestu nahi da

 

Eusko Jaurlaritzak Bizkaiko lurralde osora eta Gipuzkoara ere zabaldu du ikastetxe guztietako eskolen etena, dagoeneko Araba eta Balmasedarako dekretatuta  zegoena. Nekane Murga Osasuneko sailburuak eta Cristina Uriarte Hezkuntzako sailburuak gaur eguerdian emandako prentsaurrekoan iragarri duten erabakia hartu da Bizkaian zein Gipuzkoan kasuak ugaritu egin direla ikusita, eta, aurretik Araban bezala, Euskadin koronabirusa ez zabaltzea du helburu.

Bada, bihartik aurrera, Bizkaiko eta Gipuzkoako ikastetxeek —haur-eskolek, Lehen eta Bigarren Hezkuntzako ikastetxeek— eta unibertsitateek (EHU, Mondragon eta Deustuko campus-ak barne) ez dute eskola-jarduerarik izango. Eskolaz kanpoko jarduerarik ere ez da egingo.

Bi sailburuek adierazi dute jakitun direla horrelako erabakiek gizartean duten eraginaz eta familietan sortzen duten ziurgabetasunaz, baina nabarmendu dute salbuespenezko neurriak direla salbuespenezko egoera bati aurre egiteko, eta, adituek diotenez, ezinbestekoak direla COVID-19aren hedapena eragozteko.

Nekane Murgak azpimarratu du euste-neurriak direla. “Euskadiko  haurrak osasuntsu daude, baina, euren ezaugarriengatik, birusa oso erraz transmititzen duen kolektiboa dira, eta beldurra da birusa haien etxeetara eraman ahal izatea, bertan pertsona kalteberak egon baitaitezke, eta horien osasunean, ordea, koronabirusak eragina izan baitezake”, argitu du.   

Era berean, indarrean jarraitzen dute azken egunotan hartutako neurri guztiek. Izan ere, egoera aldakor honen testuinguruak behartu egiten du gomendioak egoera bakoitzera egokituz joatera. Nekane Murga sailburuak argi utzi du herritarren osasuna lehentasuna izan dela, dela eta izaten jarraituko duela.

 

HERRITARREN LANKIDETZA

Sailburuak herritarren lankidetzarako deia berretsi du, “Koronabirusaren transmisioa geldiaraztea guztion erronka delako. Osasun-agintariok erabat jabetuta gaude dagokigun erantzukizunaz, baina, era berean, garrantzitsua da biztanleek Osasun Sailaren gomendioei jarraitzea”. Hala, birus hori lehendik ezagutzen genuen beste edozein bezala hedatzen dela (gripea kasu) gogorarazi du, baina kasu honetan ez dugula immunitaterik hari aurre egiteko.

Azkenik, beste egun batez, gogorarazi du zeinen garrantzitsua den birusa zabaltzea saihesteko orain arte emandako gomendioei jaramon egitea:

-Eskuak arreta handiz garbitzea, eta are gehiago arnas sintomak dituztenek. Ez dugu ahaztu behar kutsapenen % 95 pertsonak sintomak dituenean gertatzen direla.

-Gainazalak garbitzea.

-Eztul egitean ukondoarekin edo erabili eta botatzeko zapi batekin estaltzea.

-Sintomak (sukarra, arnas sintomak) dituzten pertsonek ez dute egon behar adinekoekin edo gaixotasun kronikoak dituztenekin kontaktuan, edo leku publiko eta jendetsuetan.

 

AZKEN DATU EGUNERATUAK

Euskadin, beste 85 COVID-19 kasu erregistratu dira. Beraz, guztira 346 kutsatu daude, eta horietatik 147 ospitalizatuta daude.

Hildako pertsonak hiru gehiago dira atzoko egunarekiko: bi Araban eta bat Gipuzkoan. Gaur baieztatu denez, Bizkaian hildako pertsonetako bat, hasiera batean positibo gisa zenbatua, ez zegoen kutsatuta. Hortaz, koronabirusaren ondoriozko heriotzak guztira 11 dira Euskadin.

Bestalde, emaitza negatiboa duten probak, hau da, kutsatu gabeko pertsonak, 1.580 dira.

 

 . Martxoaren 12ko eguneratzea

Kasu positibo berriak

Pertsona ospitalizatuak

Hildako pertsonak

Kasu positiboak GUZTIRA

ARABA

58

103

6

259

BIZKAIA

20

38

2

71

GIPUZKOA

7

6

3

16

EAE GUZTIRA

85

147

11

346

 

*Informazio gehiago Sailaren web-orrian: http://www.euskadi.eus/covid-19-koronabirus-berria/

 

Vitoria-Gasteiz, 2020ko martxoaren 12a

 

 

 

Iruzkin bat
  • Faceless avatar thumb 70
    Zerbait esan nahi duzu?… iruzkindu albiste hau
  • 2020.eko martxoak 12

    Limitar el riesgo, establecer planes de prevención comunitarios si hiciera falta con personal agente social, sobre todo cuando en la Comunidad haya personas vulnerables, puede tenerse que nombrar persona delegada haga de persona transmisora y puente con autoridades y servicios no suponga haya incluso en su ausencia personas víctimas de engaños y estafas aprovecharse del desconcierto. Hacer más trabajo a distancia incluso en la relación con la Administración, nombrar personas facilitadoras para trámites on--line, pueden ser incluso de la Comunidad. Habilitar asesoría a distancia Administración evite desplazamientos hagan confluir personas en un mismo lugar.

Ekitaldiko kargudunak