Berriak Hezkuntza
Eu

IX. Ikasenpresa Azoka bihar Eibarren

2020.eko otsailak 05

Lanbide Heziketako 2.200 ikasletik gora elkartuko ditu gazteen artean ekintzailetza bultzatzea helburu duen azokak

 

Eibarren elkartuko dira, aurten berriro, ikasgeletan ekintzaile kultura lantzen duten Lanbide Heziketako ikasleak, Ikasenpresa Azokaren bederatzigarren edizioan parte hartzeko. Untzaga plazan eta Txantza Zelain kokatuko diren karpa eta standetan erakutsiko dituzte 2.240 ikasle inguruk euren ikastetxeetan garatu dituzten produktu eta zerbitzuak, ekintzailetza sustatzea helburu duen Ikasenpresa programaren baitako proiektu gisa. Aurten, azokan erakutsiko diren Ikasenpresa proiektuen kopurua 447raino iritsi da (376 izan ziren iaz). Ekimenean parte hartzen duten Lanbide Heziketako 82 euskal ikastetxeetako 64-tatkoak dira guztiak.

Rikardo Lamadrid Teknologia eta Ikaskuntza Aurreratuen zuzendariak IX. Ikasenpresa Azokaren irekieran parte hartuko du, goizeko 10:00etatik aurrera, Eibarko Untzaga plazan.

Ikasleek garatu dituzten produktu edo zerbitzu horiek arlo eta sektore erabat desberdinetakoak dira, hala nola, osasunaren eremukoak, ostalaritzakoak, informatikakoak, energia arlokoak, robotikaren ingurukoak, ile apaindegi eta estetika arlokoak, eraikuntzakoak edo nekazaritza arlokoak, besteak beste. Goizeko 10:00etan hasi eta 13:00ak arte iraungo du azokak Eibarko Untzaga plazan eta Txantxa Zelain.

Zer da Ikasenpresa programa?

Ikasenpresa, ikasgeletan eskola-enpresak sortzea ardatz duen hezkuntza-programa da. Proiektu horren helburuen artean enpresaren mundua ikasgeletara hurbiltzea dago eta baita gaitasun ekintzaileen garapena sustatzea ere: sormena, berrikuntza, talde-lana, erabakiak hartzea, informazioaren kudeaketa, iniziatiba, lidergoa, konpromisoa, negoziazioa, eta abar. Honez gain, ikaslea, beste kultura eta gizarte-errealitate batzuetara hurbildu eta ikastetxeen arteko elkarlana sustatu nahi da.

Programaren helburuak:

  • Ikasenpresa bat sortzea, ekintzaile izateak zer esan nahi duen jabetu daitezen ikasleak.
  • Ikasleen gaitasunak garatzea, profesional onak izan daitezen: enplegagarriak, aktiboak, ekintzaileak edo euren lantokietan ekintzaile izateko.
  • Ikasleak autoenplegua beste aukera on bat dela jabetzeko sentsibilizatzea.

Zer egiten da?

Ikasleek enpresa txiki bat martxan jarriko dute ikasgelan, eta enpresaren jarduera guztiak aurrera eramango dituzte (irudi korporatiboa, administrazioa, marketina, salerosketa, eta abar). Produktu edo zerbitzu errealak izango dira, beraiek ekoiztu edo merkaturatutakoak.

Oraindik ez dago iruzkinik
  • Faceless avatar thumb 70
    Zerbait esan nahi duzu?… iruzkindu albiste hau
Komunikabideek behera kargatzeko
Ekitaldiko kargudunak
(XI legealdia 2016 - 2020)