Berriak Osasuna
Eu

Osasun Sailak eta Osakidetzak informazio-kanpaina bat abiarazi dute “plater osasungarria”ren inguruan, gehiegizko pisua eta obesitatea prebenitzeko

2020.eko urtarrilak 23

OSASUN SAILAK ETA OSAKIDETZAK INFORMAZIO-KANPAINA BAT ABIARAZI DUTE “PLATER OSASUNGARRIA”REN INGURUAN, GEHIEGIZKO PISUA ETA OBESITATEA PREBENITZEKO

Materiala hainbat euskarritan dago eskuragarri, besteak beste, plater berrerabilgarri bat, familiei eguneroko elikaduran bisualki lagunduko diena eta pediatriako kontsultetan entregatuko dena

Osakidetza lehen seihilekoan hasiko da aplikatzen obesitateari aurre egiteko modu berri bat, aurrez aurreko kontsultak eta teknologia berriak uztartuko dituena

Osasuneko sailburu Nekane Murgak gogorarazi du “osasun publikoko arazo” baten aurrean gaudela eta lehentasunezkoa dela ingurune eta ohitura osasungarriak sortzeko lan egitea

Osasun Sailak eta Osakidetzak laguntza-material batzuk argitaratu dituzte herritarrei elikaduraren arloko ohitura osasungarrien berri emateko, gehiegizko pisua eta obesitatea prebenitzea helburu dela. Gainera, Osakidetza seihileko honetan hasiko da Pediatriako kontsultetan tratamendu berri bat garatzen, teknologia berrien erabilera aurrez aurreko kontsultekin uztartzen duena.

SANO Osasun Sailaren Haurren Obesitatearen aurkako Estrategiaren inguruan abiarazitako neurri batzuk besterik ez dira, gaur prentsaurrekoan Osasuneko sailburu Nekane Murgak aurkeztu dituena. Sailburuak ohartarazi duenez, “haurrak, mundu osoan, obesitateagatik prezio altua ordaintzen ari dira”, eta nabarmendu du “osasun publikoko arazo” baten aurrean gaudela eta, horregatik, lehentasunezkoa dela ingurune eta ohitura osasungarriak sortzeko lan egitea, betiere beste erakunde eta sektore batzuekin lankidetzan.

Hala, Osasun Sailak bultzatutako neurrien artean, informazio-kanpaina bat abiarazi da, gai nagusitzat plater osasungarria duena. Kanpaina horrek modu grafikoan jasotzen du elikadura osasungarria lortzeko egunean zehar elikagai-taldeak zer proportziotan jan behar diren: % 50 fruta eta barazkiak; % 25 karbohidratoak, hala nola zerealak, patatak edo pasta; eta % 25 proteina osasungarriak, arraina, arrautzak, fruitu lehorrak, haragi bigunak eta esnekiak txandakatuta.

Plater osasungarria hainbat euskarriren bidez iritsiko da herritarrengana: olanak osasun-zentroetako fatxadetan, kartelak, azalpen-triptikoak, zamau-babesak, prentsako iragarkiak eta bideoak sare sozialetan. Baina, gainera, Pediatriako kontsultek, elikadura osasungarriari buruzko osasun-aholkua egitean, plater berrerabilgarriak izango dituzte, familiei informazio grafikoarekin emateko, eguneroko elikadura prestatzeko garaian lagun diezaieten. 

MANGOLS-EN BIDAIA

Osasun arloan, gainera, haurren gehiegizko pisua eta obesitatea lantzeko tresna berri bat izango da. El Mangolsen bidaia da, teknologia berriak eta pediatriako erreferentea duten protokolizatutako aurrez aurreko kontsultak konbinatzen dituen tratamendua. Tratamendu berri hori ESI guztietan garatuko da lehen seihilekoan, baina mailaka, 40 profesionaleko talde batetik hasita (pediatrak eta pediatren erizainak).

Tratamendu horrek Serious Games metodologia erabiltzen du tresna gisa —prestakuntza-jolasak ere esaten zaio—, eta helburu du haurrak eta familiak ahalduntzea, paziente aditu bihur daitezen. Horretarako, elikadurari, elikadurari, jarduera fisikoari, autoestimuari, aisialdi aktiboari edo etiketen irakurketari buruzko ebidentzia zientifiko handiko ezagutzak helaraziko zaizkie, besteak beste. Jokoa pazientearen historia digitalarekin integratuta egongo da, eta horrek aukera emango dio osasun arloko profesionalari hurrengo maila aktibatzeko eta haren bilakaera monitorizatzeko.

OBESITATEA GELDIARAZTEKO NEURRI GEHIAGO

Osasuneko sailburuak nabarmendu du osasun-profesionalen inplikazioa eta lankidetza funtsezkoa direla Plan SANOan jasotako helburuak lortzeko eta obesitate-indizeak murrizteko. Gogorarazi behar da, 2017ko Osasun Inkesta Nazionalaren arabera, Euskal Autonomia Erkidegoko haurren % 34k obesitatea edo gehiegizko pisua dutela.  

Hain zuzen ere, ehuneko horiek murrizteko, eta Haurren Obesitatearen aurkako Estrategiaren esparruan, dagoeneko beste proiektu batzuk garatzen ari dira, eta horien artean hauek aipa daitezke:

  • Eskola-patioak eraldatzea. Bertan, eskolako patioaren irudi tradizionala birplanteatu eta desafioa egiten da, ikasteko, jolasteko, mugitzeko eta berdintasunean eta aniztasunarekiko errespetuan oinarritutako kalitatezko harremanak eta esperientziak eraikitzeko espazio inklusibo gisa funtziona dezaten.
  • Eskola-bideak sortzea, ikasleei ikastetxeetara oinez edo bizikletaz joatea errazteko.
  • Jarduera fisikoaren orientazio-zerbitzuak sortzea udalerri- edo mankomunitate-mailan.
Oraindik ez dago iruzkinik
  • Faceless avatar thumb 70
    Zerbait esan nahi duzu?… iruzkindu albiste hau
Ekitaldiko kargudunak