Berriak Kultura eta Hizkuntza Politika

Eusko Jaurlaritzako Kultura eta Hizkuntza Politika Sailak literaturarekin eta liburuen argitalpenarekin lotutako 49 proiektu babestu zituen 2019an, sei dirulaguntza modalitateren bidez

2020.eko urtarrilak 08
  • Jaurlaritzak 811.800 euro bideratu zituen sei laguntza lerro horietara, gazteei zuzendutako euskarazko eleberri eta testuen sorkuntza, komikien edizioa edota euskal argitaletxe nagusien lana bultzatuz.
  • Bi modalitate argitaletxe enpresei zuzenduta daude, eta laguntza horiei esker, guztira 477 liburu argitaratuko dituzte.

 

Gasteiz, 2020/01/08       

Eusko Jaurlaritzako Kultura eta Hizkuntza Politika Sailak literaturaren eta liburugintzaren sektoreko 49 proiektu diruz lagundu zituen 2019an. Guztira, 811.800 euro esleitu zituen abian jarritako sei laguntza modalitateen bidez.  Bi modalitate argitaletxe enpresei zuzenduta daude, eta laguntza horiei esker, guztira 477 liburu argitaratuko dituzte. Era berean, Euskadi Literatura Sarien aurtengo zazpi irabazleek 18.000 euro jaso zituzten sari horrengatik (guztira, 126.000 euro).

Kultura eta Hizkuntza Politika Sailak sei dirulaguntza lerro jartzen ditu abian urtero, hiru deialdiren bidez, literatura eta liburuen argitalpena laguntzeko. Lehenik eta behin, Eusko Jaurlaritzak urtero jartzen du abian ‘Kultur Sormena' bultzatzeko dirulaguntza deialdia, kultur sektore ezberdinak hartzen dituena eta zazpi modalitate dituena. Horietako bi literaturarekin lotuta daude: ‘Gazteei zuzendutako euskarazko literatura testuak sortzea’ eta ‘Euskarazko ipuinak eta eleberri laburrak sortzea’. Modalitate horietako lehenengoaren bidez, 8.000 euroko bost dirulaguntza eman ziren 2019an (40.000 euro guztira), eta, besteak beste, Yolanda Arrietaren eta Oihana Iguaranen azken lanak diruz lagundu ziren. Era berean, euskarazko ipuin eta eleberri laburrak sortzen laguntzeko modalitatearen bidez, beste bost lan lagundu ziren (8.000 euro bakoitzak; 40.000 euro guztira). Atal horretan John Andueza edo Nerea Loiola izan ziren onuradunetako batzuk.

Horrez gain, Eusko Jaurlaritzak dirulaguntza deialdi bat du, batik bat argitaletxeei zuzenduta, euskarazko zein gaztelaniazko literatura-ekoizpen editoriala sustatzeko. Euskarazko ediziorako laguntzen bidez, 1.406 eta 173.234 euro arteko 18 dirulaguntza eman ziren (guztira, 511.800 euro). Dirulaguntza handienak Elkar, Pamiela eta Erein argitaletxeentzat izan ziren. Bestalde, gaztelaniazko ediziorako dirulaguntzen modalitatearen bidez, 2019an guztira 14 dirulaguntza eman ziren, 393 eta 50.286 euro artekoak (guztira, 115.000 euro). Astisendo Grupo Editorial, Elkar eta Erein izan ziren onuradun nagusiak. Guztira, deialdi honetako bi modalitateen bidez dirulaguntzaren bat jaso duten argitaletxe horiek 477 liburu argitaratu edo argitaratuko dituzte (317 euskaraz eta 160 gaztelaniaz).

Hirugarrenik, Kultura eta Hizkuntza Politika Sailak 2017an jarri zuen abian ‘Irudi Sorkuntza’ sustatzeko dirulaguntza deialdia, bi modalitate dituena: 'Komikiak eta eleberri grafikoak' eta ‘Album ilustratuak'. Komikiak sortzeko modalitatearen bidez, 15.000 euroko lau laguntza eman ziren (60.000 euro, guztira), eta Higinia Garay, Alejandro Macho, Iñaki Martiarena eta Iñaki Martinezen azken proiektuak lagundu ziren. Era berean, album ilustratuak egiteko modalitatearen bidez, hiru proiektu lagundu ziren, bakoitzarentzat 15.000 euroko dirulaguntza emanez; Itziar Aranburu, Ane Arzelus eta Eider Eibar izan ziren laguntza horien onuradunak.

Halaber, hiru deialdi eta sei modalitate horiez gain, Kultura eta Hizkuntza Politika Sailak literaturarekin eta liburugintzarekin lotutako beste hainbat proiektu babesten ditu.  Euskadi Literatura Sariak antolatzen ditu, editore eta idazle elkarte nagusientzako dirulaguntza izendunak ematen ditu eta Durangoko Azoka ere diruz laguntzen du. Azkenik, jaialdiak antolatzeko dirulaguntza deialdiak literatura ardatz duten zenbait jaialdi laguntzen ditu.

 

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko
Ekitaldiko kargudunak