Ikerlan batek eremu digitalean nerabeen artean transmititzen den sexismoa eta matxismoa aztertu du

• Besteak beste, teknologien erabileran dauden genero-eten digitalak ematen dira, emakumeen gorputzen hipersexualizazioa sarean, gizonezkoen menderatze digitala eta ziberindarkeria, hala nola ziberjazarpen sexuala eta/edo sexista.
• Aldi berean, aldaketarako pitzadurak eta aukerak antzematen dira, batez ere (ziber) feminismoaren, hezkidetzako pedagogiaren eta alfabetizazio digital kritikoaren eskutik.

Emakunde/Emakumearen Euskal Erakundeak Estíbaliz Linares Bahillok egindako "El iceberg digital Machista: análisis, prevención e intervención de las realidades machistas digitales entre la adolescencia en la CAE" azterlana argitaratu du. Ikerlan horrek irabazi zuen Emakundek emakumeen berdintasunaren inguruko ikerketak zabaltzen laguntzeko deitzen duen ikerlanen Lehiaketaren seigarren edizioa.

Gaur goizean egileak Emakundeko zuzendari den Izaskun Landaidarekin batera aurkeztu duen ikerlanak aztertzen du emakumeen eta gizonen genero-desberdintasunek EAEko gazteen interakzio digitalean duten eragina. Dokumentuen azterketa eta aro digitalean jaiotako nerabeekiko elkarrizketaren bidez, egiaztatu da generoko desberdintasun sozialak eremu digitalera transmititzen direla, eta, horrela, sendotu egiten dira, besteak beste, generoaren araberako eten digitalak teknologien trebetasunetan eta erabileran, emakumeen gorputzen hipersexualizazioa eta hipererotizazioa sarean, gizonezkoen menderatze digitala eta ziberjazarpen sexual eta/edo sexista bezalako ziberindarkeriak. Aldi berean, aldaketarako pitzadurak eta aukerak antzematen dira, batez ere (ziber) feminismoaren, hezkidetzako pedagogiaren eta alfabetizazio digital kritikoaren eskutik.

Ikerketaren hasieran, ibilbide bibliografiko zatikatua egin da, hiru bloke komunetan banatuta. Horietan, nerabeen mundu digitalaren egoera genero-ikuspegitik aztertzen da. 11 institutuk parte hartu dute, DBHko 4. mailako eta batxilergoko 1. mailako mailekin, erlazionatzen diren hiru fase nagusitan oinarrituta: I. azterketaren xedearen diagnostikoa, modu kuantitatiboan, galdetegi itxiko teknikaren bidez (778 ikasle igaro dira); II. Azterketaren xedean sakontzea, natibitate digitalaren ahotsak eta hipertestua, eztabaida-taldeak (45 ikasle) eta foro telematiko bat (34 parte-hartzaile) erabiliz; eta III. Esku-hartzea eta prebentzioa azterlanaren xedean (20 parte-hartzaile).

Emaitza aipagarrienen artean, honako hauek azpimarra daitezke:

• Nerabeen mundu digitala kontraesankorra da (oso espazio subertsiboak ematen diren bitartean, segmentu matxistak ere ematen dira).
• Nerabezaroan, generoaren araberako bigarren eta hirugarren eten digitalak antzeman dira, eta, zehazki, bideo-jokoak oztopo garrantzitsuak dira nesken karrera informatikoetarako.
• Bideojokoen edukian eta Youtuben sexismoa eta matxismoa daude.
• Sare sozialetan ikusi da irudiaren nagusitasuna dagoela, eta bereziki neskei egiten diela kalte.
• Nesken aurkako ziberindarkeria modu zehatzak errepikatzen dira (ziberjazarpen sexualak eta sexistak)
• Nerabezaroan, eta bereziki nesken artean, maitasun erromantikoaren mito batzuk normalizatuta eta integratuta geratzen dira, eta horrek mendekotasun-harremanak izatera eramaten ditu.
• Hezkidetza- eta prebentzio-programen bidez, eraldaketa sakonak sor daitezke nerabeen kodeetan.