Eu

Udalek ingurumen-hobekuntzak egiteko 74 proiektu gauzatuko dituzte Eusko Jaurlaritzaren babesarekin

2019.eko martxoak 03
  • Diru-laguntzen partidarik handiena, 605.000 euro, klima-aldaketaren kontra borroka egiteko bideratu da.
  • Lurzoruaren inguruko kalitatezko ikerketak gauzatzeko eta kutsatutako lurzoruak berreskuratzeko proiektuen multzoak 600.000 euro jaso ditu.
  • Ingurumen, Lurralde Plangintza eta Etxebizitza Sailak 506.000 euro erabiliko ditu natura-ondarea eta biodibertsitatea kontserbatu eta babesteko proiektuak gauzatzen laguntzeko.
  • Ekonomia zirkularrarekin loturiko proiektuek 160.000 euroko diru-laguntza jaso dute.
  • Udalen eta ikastetxeen artean koordinaturiko jasangarritasunaren aldeko hezkuntza-proiektuek 260.000 euro jaso dituzte.

Eusko Jaurlaritzako Ingurumen, Lurralde Plangintza eta Etxebizitza Sailak 2018tik eta 2020ra bitartean gauzatuko diren garapen jasangarrirako 121 proiektu lagunduko ditu 2,16 milioi euroko diru-laguntzarekin. Udalek, mankomunitateek, tokiko erakunde autonomoek eta tokiko garapenerako agentziek bultzatuko dituzten proiektuak izango dira. Ekarpen horiek Eusko Jaurlaritzak ingurumenarekin duen konpromisoan kokatzen dira. Konpromiso hori “Euskadi 2020: giza garapen iraunkorrean aurrera egitea” programan islatzen da.

Diru-laguntzen partidarik handiena, 605.000 euro, klima-aldaketaren kontra borroka egiteko bideratu da. Kopuru hori 19 proiektutara bideratuko da; besteak beste: ibilgailu elektrikoen erosketarekin loturiko proiektuetara, disuasio-aparkalekuak eraikitzeko ekimenetara, bidegorriak edo mugikortasuna errazten duten loturak lehenesten dituzten bidegorrien loturak eraikitzeko proiektuetara, eta klima-aldaketara egokitzeko planak eta klima-aldaketaren ondorioak minimizatzeko neurriak egiteko proiektuetara.

19 proiektu horiek ezartzeari esker, urtean 280 tona CO2 310 kg NOx eta 16 kg partikula gutxitzea lortuko da. Era berean, bidegorrien 4,86 km eta 135 aparkaleku eraikiko dira udalerrien barruan trafikoa saihesteko.

Kutsakorrak izan daitezkeen jarduerak jasan dituzten lurzoruak ikertzera, lurzoru kutsatuak berreskuratzeko ekintzak gauzatzera, ingurumen-jarraipenak egitera eta industria-hondakinak berreskuratzeko ingurumen-ekintzak burutzera bideratutako 22 proiektuek 600.000 euroko diru-laguntza jaso dute.

Diruz lagundutako jarduketak 251.527 m2-ko azalerak ikertzera bideratuta daude; berreskuratze-jarduketek, berriz, 24.327 m2-ko guztizko azalera duten eremuak hobetuko dituzte.

Natura-ondarea eta biodibertsitatea hobetzea

Gainera, Ingurumen Sailak 506.000 eurorekin lagundu ditu natura-ondarea eta biodibertsitatea kontserbatzea, berrezartzea edo hobetzea xede duten tokiko erakundeen 23 proiektu.

Diruz lagundutako jarduketek, nagusiki, honako eragin hauek murriztu nahi dituzte, besteak beste: ekosistemaren zatiketa eta degradazioa, espezie inbaditzaile exotikoen hedapena edo ibaiko sistemetan hondakinak pilatzea. Aipaturiko jarduketak egingo diren tokiari dagokionez, diruz lagundu beharreko proiektuen erdiak gutxi gorabehera naturagune babestuetan edo lurraldearen konektagarritasun ekologikorako garrantzitsuak diren eremuetan garatuko dira. Zehazki, Natura 2000 Sarearen 10 gunek etekinak lortuko dituzte diruz lagundutako proiektuei esker. Gune horietako 5 Araban daude, 3 Gipuzkoan eta 3 Bizkaian.

Diruz lagundu beharreko proiektuei esker, intereseko habitaten 190 hektarea inguru kontserbatu, berrezarri edo hobetuko dituzte zuzenean. Jarduketak honako habitat hauetan egingo dira: baso naturaletan, hezeguneetan, mendiko larreetan, ibai-ertzetako basoetan eta kostaldeko txilardietan. Era berean, beren-beregi desagertzeko arriskuan dagoen fauna eta flora espezieak —esate baterako, xarma (Carpinus betulus), bisoi europarra (Mustela lutreola) eta iratze paleotropikala (Woodwardia radicans)— kontserbatu eta berreskuratzera bideratutako proiektuak direlako nabarmentzen dira.

Bestalde, ekonomia zirkularra sustatzeko, hondakinak sortzea saihesten duten ekintzak ezarriz (nagusiki, janaria alferrik ez galtzea eta hondakin biologikoa), 10 proiektuk 190.000 euroko diru-laguntza jaso dute.

Honako hauek nabarmentzen dira: janaria alferrik ez galtzeko prebentzioa sustatzen eta ezartzen dituzten mekanismoak; sorgailu handietan materia organikoa gaika biltzeko sistemak, horien tratamendu biologikorako; sortze bidezko ordainketa-sistemak ezartzea gaika bildu ez diren hondakina sortzea saihesteko eta gaikako bilketa indartzeko xedearekin; errefusaren bilketan erabiltzailea identifikatuz eta hondakin biologikoaren frakzioan modu konbinatuan bilduz gaika bildu ez diren hondakinak sortzea saihesten laguntzen duten sistemak ezartzea; eta erreparatzea eta autoerreparatzea sustatzen dituzten herritarrentzako xedaturiko negozioak edo sistemak. Ekimen horiek ontzi arinen gaikako bilketa urteko 20 tonatan eta hondakin organikoarena urteko 490 tonatan igotzea ahalbidetuko dute.

Jasangarritasunerako Heziketaren ildora bideratutako 260.000 euroei esker, 103 udal elkarlanean aritu dira 364 ikastetxerekin eta 185.000 ikasle inplikatu dituzte klima-aldaketa, natura-ondarea eta paisaia, elikadura jasangarria, lurraren zaintza eta aztarna ekologikoa eta hondakinen gisako esparruetan.

Eraginik handiena izan duten koordinazio-jarduerak ikastetxeen arteko foroak eta udal foroak izan dira. Topaketa horietan, zentroek proposamenak egin ohi dituzte eta udalak konpromisoak egokitzen ditu gauzatu beharreko jarduketen arabera. Irteerak eta ikasleek familiekin egin ohi dituzten jardunaldi teknikoak dira gehien gauzatzen diren beste jardueretako batzuk.

 

Oraindik ez dago iruzkinik
  • Faceless avatar thumb 70
    Zerbait esan nahi duzu?… iruzkindu albiste hau
Komunikabideek behera kargatzeko