Berriak Osasuna
Eu

Gripeak atalase epidemikoa gainditu du euskadin lehen aldiz

2018.eko abenduak 19

Gripea 100.000 biztanleko 122,3 kasura iritsi da, eta Lehen Mailako Arretako zentroetan garbi nabaritu da; Gipuzkoak izan du intzidentziarik handiena

 

Gripeak nabarmen egin du gora azken astean Euskadin, eta 100.000 biztanleko 122,3 kasura iritsi da. Horrek esan nahi du gainditu egin dela atalase epidemikoa (55,7 kasu 100.000 biztanleko). Birusaren intzidentzia garbi nabaritu da Osakidetzaren Lehen Mailako Arretaren sarean, aste honetan 959 kontsulta erregistratu baitira gripearen sindromeagatik; Gipuzkoak izan du intzidentziarik handiena.

Horixe dio Osasun Sailaren eta Osakidetzaren Zainketa Epidemiologikoaren/Mediku Jagoleen Sarearen azken txostenak, gripeak abenduaren 10etik 16ra bitarte izan duen bilakaera aztertu ondoren. Txosten horrek agerian utzi duenez, egiaztatutako gripearekin ospitaleratutako 35 kasu jakinarazi dira orain arte, eta, haietatik, 16k larritzat hartzeko irizpideak betetzen dituzte.

Larriki ospitaleratutako pertsonen batez besteko adina 62,75 urte da, eta % 56,4 emakumeak dira. Azpimarratu beharra dago ospitaleratutako pertsonen artean arrisku-talderen batekoak izan litezkeenen % 71,4 ez zeudela txertatuta. Osasun Sailak eta Osakidetzak azpimarratu dute oso garrantzitsua dela txertoa jartzea, neurririk eraginkorrena baita gripeari aurre egiteko eta gaixotasun horren kutsapenaren ondoriozko osasun-konplikazioak saihesteko. Hori dela eta, Osakidetzaren osasun-zentroetan abenduaren 31ra arte jarriko da dosia, arrisku-taldeetako ahalik eta jende kopururik handienera iristeko: 65 urtetik gorakoak, gaixotasun kronikoren bat duten pertsonak edo haurdun dauden emakumeak.

Txertaketa-kanpaina joan den urriaren 24an abiarazi zenetik, guztira 347.292 pertsonak hartu dute dosia Euskadiko Lehen Mailako Arretako zentroetan, eta, beraz, % 53,78ko estaldura-maila lortu da 65 urtetik gorako biztanleen kasuan. Gainera, datuak behin-behinekoak badira ere, % 5etik gorako igoera ikusi da Osakidetzako profesionalen artean txertoa jartzea erabaki dutenen kopuruan.  

Gripea, urtero agertzen den osasun publikoko arazoetako bat izateaz gain, ondorio larriak eragin diezazkieke pertsonarik kalteberenei. Joan den denboraldian, gripearekin larriki gaixotutako 446 pertsona ospitaleratu behar izan ziren.

Kanpaina honetan, Erakunde Sanitario Integratu guztiek beren kontingentzia-plan espezifiko eta eguneratua dute, osasun-zentroetan eskaririk handieneko uneetan beharrezkoak diren baliabideekin erantzun ahal izateko.  Osakidetzako zentroek, oro har, 5.000 ohe baino gehiago dituzte, eta aurten igo egin da kopuru hori, Urdulizko ospitaleak ohe gehiago ipini dituelako.

 

Vitoria-Gasteiz, 2018ko abenduaren 19a

Oraindik ez dago iruzkinik
  • Faceless avatar thumb 70
    Zerbait esan nahi duzu?… iruzkindu albiste hau