Eu

Kultura Ondarea Sariaren datorren edizioa abian jarri du Eusko Jaurlaritzak, kultura ondarearen balioa gazteen artean nabarmentzea helburu duen ekimena (Gobernu Bilera 2018-12-11)

2018.eko abenduak 11

Proiektuan parte hartzen duten ikasle-taldeek 3 eta 10 minutu bitarteko bideoak egin behar dituzte gai honi buruz

Eusko Jaurlaritzako Gobernu Batzordeak bere gaurko saioan agindu bat onetsi du, Kultura Ondarea Saria ekimenaren deialdia egin eta arautzen duena. Ekimena, berrikuntza, ekintzailetza, sormena eta hezkuntza-jardueraren garapen soziala sustatzea da sari honen helburua, Euskal Kultura Ondarea ezagutu eta balioesteko, adierazpide orotan, materiala zein immateriala izan. Sari hau antolatzeko zuzendutako aurrekontua 30.000 eurokoa da.

Kultura Ondarea Sariaren datorren edizioa, 2019koa, bosgarrena izango da, eta bere helburuen artean daude:

  • Euskal Kultura Ondareari buruzko ezagutza ikertu, berreskuratu eta eraikitzeko egiten den ahaleginaren aintzatespena eta kultura berritzailea sustatzea.
  • Euskal Kultura Ondarea ezagutzera ematea, Euskal Hezkuntza Sistematik eta Sistemarentzat.
  • Hezkuntzako ekimen berritzaileak abian jartzeko babesa ematea.
  • Euskal Kultura Ondareari lotutako ezagutza balioesteko eta eraikitzeko gazteriak betetzen duen zeregina aintzat hartzea.
  • Gazteek tresna teknologikoak erabil ditzaten sustatzea kulturaren eta hezkuntzaren arloko edukiak sortzeko.

Proiektu honetan Derrigorrezko Bigarren Hezkuntzako 3. eta 4. mailako ikasleek, Batxilergoko 1. mailakoek eta Erdi Mailako Heziketa Ziklokoek parte hartzen dute. Proiektuan parte hartzen duten taldeek 3 eta 10 minutu bitarteko bideoak sortu behar dituzte. Ikasleek kontakizun bat landu behar dute gai espezifiko baten inguruan eta horretarako ikus-entzunezko teknikak erabili behar dituzte, taldean lan eginez eta ondarearen gaineko ikuspegi berritzaile bat eskainiz.

2018ko edizioan ikastetxe hauetako ikasleek jaso zuten saria: Barakaldoko Minas Institutua, Maristak Durango Ikastetxea eta, azkenik, Donostiako Bidebieta Institutua. Gainera, Maristak Ikastetxeak sari berezia jaso zuen bideo gehien bidali zuen ikastetxea izateagatik. Irabazleek bidaia bat egin zuten Napolira sari gisa.

Oraindik ez dago iruzkinik
  • Faceless avatar thumb 70
    Zerbait esan nahi duzu?… iruzkindu albiste hau
Komunikabideek behera kargatzeko