Berriak Enplegua eta Gizarte Politikak

Eusko Jaurlaritzak 18.000 euro bideratuko ditu ahultasun-egoera berezian eta gizarte-bazterketa larrian dauden migratzaileei harrera egitera (Gobernu Bilera 2018-11-06)

2018-11-06

Beatriz Artolazabal Enpleguko eta Gizarte Politiketako sailburuak proposatuta, Gobernu Kontseiluak onetsi du Goiztiri Elkarteari 18.514,03 euro ematea, Euskadira iristen diren eta ahultasun-egoera berezian eta gizarte-bazterketa larrian dauden migratzaileei harrera egiteko. Zuzeneko diru-laguntza horren bidez, pisu bat gaituko da Bizkaian, harrera integrala egiteko. 

2000. urtetik, elkarte horrek Harrera programa du abian, etorkinei harrera egiteko, gizarte-bazterketa larrian dauden migratzaileen oinarrizko premiei erantzuteko, gizartean integratu ahal izateko eta gizarte-eskubideak baliatu ahal izateko.

Programa horren bidez, gaur egun, baldintza ekonomikoak eta pertsonalak direla eta, prestazioen sistema normalizatura jo ezin duten eta gizarte-bazterketa larrian dauden migratzaile guztiei egiten zaie harrera.

Harreraren bidez, aldi baterako lehen harrera pisuetan egiten zaie. Horietan, Goiztiri Elkarteak gizarte-bazterketa larrian dauden eta ekonomia-baliabiderik eta/edo laguntza-sarerik ez duten pertsona horiek gizarteratzeko prozesua lantzen du.

Goiztiri Elkartearen helburuetako bat, besteak beste, pobrezia-egoeran eta gizarte-bazterketarako arriskuan dauden pertsona  eta kolektiboei laguntzea da; horretarako, kausei heltzen diete, ondorioak arintzen dituzte, gizartea sentsibilizatzen dute eta helburu horretarako ekintzak eta zerbitzuak eskaini eta garatzen dituzte.

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko