Berriak Lehendakaritza
Eu

Garapenerako Lankidetzaren 2018-2021 aldirako IV. Gida Planaren onarpena

2018.eko uztailak 26

Kontseilu Gobernuak gaur, uztailak 24, Garapenerako Lankidetzaren 2018-2021 aldirako IV. Gida Plana onetsi egin du. Plan hau 2018ko lehen seihilekoan landu da eta Garapenerako Lankidetzaren Euskal Agentziaren barruan eratutako zazpi lantaldek sorrarazitako hausnarketetatik abiatu zen hasierako proposamena, eta Garapenerako Lankidetzaren Euskal Kontseiluaren esparruan antolatutako lan-jardunaldi batzuetan kontrastatu ziren haien ideia nagusiak. Horretaz gain, garrantzizko bi oinarri izan ditugu, plangintza honen planteamendua gidatu dutenak: Garapenerako Lankidetzaren 2018-2021 Urte Anitzeko Plangintza Estrategikoaren Orientabide Orokorrak eta Eusko Biltzarreko Giza Eskubide eta Berdintasun Batzordean 2017ko abenduaren 20an onetsitako 35 ebazpenak; eta Garapenerako Lankidetzaren 2014-2017 aldirako III. Gida Planaren ebaluazioa, 21 gomendio proposatzen dituena planaren diseinua eta ebaluagarritasuna hobetzeko, eta baita helburuak lortzeko kudeaketa hobetzeari buruzko 5 ikasbide eta oraingo plan hau lantzeko 6 erronka ere.

IV Gida Planaren lehen zirriborroa kontsulta publikora jarri zen Irekia atariaren bitartez, eta gizarte-eragileen eta erakunde-mailako eragileen iritziak eta ekarpenak jaso ziren. Jarraian, Garapenerako Lankidetzaren Euskal Kontseiluaren osoko bilkuran aurkeztu zen, eta hark aginduzko txostena egin zuen ekainean. Azkenik, gaur Gobernu Kontseiluak onetsi egin du.

2018-2021 aldi berri honetan, Eusko Jaurlaritzak bultzatutako eta III. Gida Planaren esparruan hasitako lankidetza-ereduaren berrikuspenean aurrerapausoak ematen jarraitzea da gure asmoa. Nazioarteko testuinguruak planteatzen dizkigun erronkei erantzuteko, eta Eusko Jaurlaritzak bultzatutako lankidetzaren ahalmen eraldatzailea zabaltzeko, egiteko modu jakin batzuetan eta euskal lankidetzaren printzipioetan sakondu beharra dago, eta baita ikuspegi berriak bultzatu ere, gure lankidetza-eredua berrikustea ahalbidetuko digutenak. 2030 Agenda eta Garapen Iraunkorrerako Helburuak (GIH) onesteak aukera-agertoki bat zabaltzen du hainbat erronkari heltzeko, besteren artean: garapenerako politiken koherentzia, eragile desberdinen egituraketa eta gobernuen zeregin proaktiboago baten premia.

Dokumentu honek 2018-2021 aldirako plangintzaren funtsezko elementuak biltzen ditu, bederatzi kapitulutan antolatuak:

- Lehen kapituluan, nazioarteko testuingurua eta 2030 Agendak gure lankidetza-politika finkatu eta zabaltzeko duen ahalmena aztertu eta bultzatu nahi dugun garapena karakterizatu dugu.

- Bigarren kapituluan, aldi horretarako aurreikusitako eginkizuna, ikuspegia, printzipioak eta helburuak aurkeztu ditugu.

- Hirugarren kapituluan, berriz, datozen urteetan euskal lankidetzaren eraldaketa-ahalmena sustatzeko bultzatu nahi ditugun ikuspegiak daude bilduta.

- Laugarren kapituluan, zeharkako lehentasunak, sektorialak, geografikoak eta testuinguruaren araberakoak ezarri ditugu.

- Bosgarren kapituluan, ikuspegien eta lehentasunen kapituluetan planteatutako erronkei aurre egiteko bultzatuko diren jardun estrategikoaren ardatzak zehaztu ditugu.

- Seigarren kapituluan, datozen urteetarako komunikazioaren aldeko gure apustua burutzen eta zehazten da.

- Zazpigarren kapituluan, adierazitako aldirako proposatutako jarraipen eta ebaluazioko sistema aztertzen da. Kapitulu hori I. eranskineko jarraipen eta ebaluazioko matrizearekin osatuta dago.

- Zortzigarren kapituluan, plana inplementatzeko beharrezkoak diren baliabideak, tresnak eta parte hartze eta gobernantza-sistema daude zehaztuta.

- Azkenik, bederatzigarren kapituluan, AUZO(LAN)KIDEAK aurkeztu ditugu. Ekimen enblematikoak dira eta, jardun estrategikoaren ardatzen esparruan, planean planteatzen diren ikuspegi berriak garatzen dituzte.

- Dokumentuaren amaieran, eranskin gehigarri bat dago. II. eranskinean, Eusko Jaurlaritzaren beste sail batzuk osagarritasunari, koordinazioari eta koherentziari lotuta egiten ari diren ekimenen mapaketa bat gehitu dugu.

Iruzkin bat
  • Faceless avatar thumb 70
    Zerbait esan nahi duzu?… iruzkindu albiste hau
  • @AzalgorriBilbao
    2018.eko uztailak 26

    Comentario de Twitter:
    ℹ️ Aprobación del IV Plan Director de Cooperación para el Desarrollo 2018-2021 ➡︎ https://t.co/ZvTKZLvqZ1

Komunikabideek behera kargatzeko
Ekitaldiko kargudunak