Berriak Osasuna
Eu

Osasun sailak eta Osakidetzak “Irribarre egitea ez da ezer kostatzen” kanpaina jarri dute abian, euskal familiak kontzientziatzeko seme-alaben aho-hortzen osasunerako PADI programaren onurez eta garrantziaz

2018.eko urtarrilak 22
  • Helburua da PADIn neska-mutil gehiagok parte hartzea eta batez ere aukera gutxien duten taldeak programan sartzea sustatzea
  • Egun hauetan 7 urtetik 15 urtera bitarteko seme-alabak dituzten Euskadiko 156.000 familia ari dira etxean PADI programaren gutunak jasotzen urteko azterketa egitera gonbidatzeko. Programak irudi berria estreinatu du aurten, eta programari buruzko informazioa biltzen duten liburuxka berriak prestatu ditu gurasoentzat.
  • Kanpainaren helburua da neska-mutilei ikusaraztea zein garrantzitsua den aho-hortzen osasuna, eta, horretarako, aholku sinpleak eta praktikoak biltzen dituzten liburuxka deigarriak prestatu dira, 150.000tik gora, Osakidetzako osasun-erakundeetan, ikastetxeetan eta PADI programarekin lankidetzan diharduten dentisten kontsultetan banatuko direnak, kanpainaren leloa erakusten duten kartelekin batera.
  • Programan parte hartzera gonbidatu ziren 194.752 neska-mutiletatik 129.290 artatu zituen PADI programak 2017an, 1990ean ezarri zenetik artatu den kopururik handiena, beraz, eta estaldura % 66,38koa izan du, azken hamarkadan izan duen egonkortasunari eutsiz.

 

Eusko Jaurlaritzako Osasuneko sailburu Jon Darpónek gaur goizean aurkeztu du PADI programaren “Irribarre egitea ez da ezer kostatzen” kanpaina, familiak sentsibilizatzeko eta aho-hortzak zaintzeko prebentzio-programa honetan parte hartzera gonbidatzeko. Doakoa, unibertsala eta irisgarria den programa honen helburua Euskadiko neska-mutilen aho-hortzen osasuna hobetzea da. Kanpaina berriaren aurkezpenean Osasuneko sailburuarekin batera izan da Dentisten Euskal Kontseiluko presidente Jose Manuel Fika, eta dentisten izenean kanpaina babestu du prebentzio-programa hau sendotu eta hedatzeko helburuarekin.

Osasuneko sailburuak gogoratu duenez, kanpaina hau PADI urtero erabiltzen duten haurren kopurua igotzeko jardueretako bat da, eta datuak onak badira ere “helburua da egungo estalduraren ehunekoa igotzea eta bereziki gizartean aukera gutxien dituzten taldeen sarbidea sustatzea, bai eta euskal familiei Haurren Hortzak Zaintzeko Programaren onurak ikusaraztea ere, kontuan hartuta aho-hortzen osasunaren prebentziorako eta txantxarraren eta beste lesio batzuen tratamendu goiztiarrerako garrantzizkoa dela neska-mutil guztiek egitea urtean azterketa bat gutxienez”. Urteko azterketa horri esker aho-hortzen osasun kaxkarrak etorkizunera begira eragiten dituen arazoak saihestu ahal izango dira, eta sailburuak azpimarratu duenez, helburua da datozen urteotan, 2020ra begira, urtean % 75etik gora izatea programa erabiltzen dutenak.

Egun hauetan, beraz, 7 urtetik 15 urtera bitarteko adingabeak dituzten 156.000 familia, guztira ia 196.000 neska-mutil, ari dira jasotzen etxean seme-alaben urteko azterketa egitera gonbidatzeko gutunak, PADIren irudi berria eta informazioa biltzen dutenak. Gutun horietan iritsiko zaizkie onarpen-taloiak, dentista aukeratzeko kontsulten liburuxka eta edozein zalantza argitzeko edo programari buruzko informazio gehiago eskatzeko harremanetarako telefono-zenbakiak eta helbide elektronikoak, eta, horrez gainera, informazio-liburuxka berri bat gehitu da modu errazean azaltzeko programa zer den eta nola erabiltzen den, eta aho-hortzen osasunerako aholku batzuk.

Era berean, kanpainarekin neska-mutilei ikusarazi nahi zaie zein garrantzitsua den aho-hortzen osasuna. Beste berrikuntza bat da kanpaina aurten ez dela Osakidetzan bakarrik egingo; ikastetxeetara eta PADIn parte hartzen duten dentisten kontsultetara ere hedatuko da. Horretarako, 150.000 triptikotik gora prestatu eta banatuko dira. Liburuxka deigarri horiek bereziki neska-mutilei zuzenduta daude, eta hortz-haginak zaintzeko aholku sinple batzuk ematen dituzte. Aldi berean, kanpainaren irudia eta leloa erakutsiko duten 3.000 kartel baino gehiago jarriko dira.

Jon Darpón sailburuaren esanetan, Jaurlaritzako sailen eta kanpoko eragileen —PADIren kasuan— dentisten, arteko koordinazioa funtsezkoa da osasun-heziketarako kanpainetan. Hala, bada, eskerrak eman dizkie PADI programan parte hartzen duten eta orain dela 28 urtetik Euskadiko neska-mutilen aho-hortzetako osasuna zaintzen duten profesional guztiei egindako ahaleginagatik eta lanagatik eta erakutsitako arduragatik. PADIri esker, eta emandako arretaren emaitza gisa, Euskadiko haurren aho-hortzen osasunaren indizeak Estatuko rankingeko lehenbiziko postuan daude, programa hau garatzen aitzindaria izanik, eta herrialde garatuetako onenen artean, Euskadi CAO indizean lehenbizikoetakoa izanik osasunaren arloan punta-puntakoak diren herrialdeekin batera, adierazi du Osasuneko sailburuak.

“Irribarre egitea ez da batere kostatzen” kanpaina Osakidetzaren eta Osasun Sailaren webgunean, APPn eta gizarte-sareetan ere egongo da, eta bertatik eskuratu ahal izango da aho-hortzetako doako programa honi buruzko informazio osoa. Osakidetzaren ospitaleetako eta osasun-zentroetako olanetan ere egongo da ikusgai.

2017ko balantzea

Iaz programan parte hartzera gonbidatu ziren 194.752 neska-mutiletatik 129.290 artatu zituen PADI programak,1990ean ezarri zenetik artatu den kopururik handiena, eta estaldura % 66,38koa izan du, azken hamarkadan izan duen egonkortasunari eutsiz.

2017ko balantzearen datuetatik ondorioztatzen da 15 urteko neska-mutilen % 92,5ek erabili dutela PADI behin gutxienez 7 urte bete zituztenetik. Batez beste, egin litezkeen 9 bisitetatik 6,4 egin dituzte, eta laurdenak baino gehiagok (% 29k) estaldura-ekitaldietako bakoitzean eta guztietan jo zuten PADI programan parte hartzen duten dentistengana.

PADIren asistentzia bitartekoetan 103 udalerritako 1.047 dentista daude, Osakidetzako kontsulta espezializatuez gain. Urteroko hortz-haginen azterketak eskaintzen ditu, bai eta prebentziozko jarduerak eta hortz iraunkorretan beharrezkoak diren tratamendu zuzentzaileak ere (fisurak zigilatzea, txantxarrak eta traumatismoak buxatzea). Iaz, esate baterako, programaren bitartez, 129.290 azterketa, 17.260 zigilatze, 19.999 buxadura, 1.367 erauzketa, hortz-mamiko 366 tratamendu eta traumatismoen edo malformazioen ondoriozko 1.654 interbentzio egin ziren. Arreta jaso duten haur guztietatik % 93,8k dentista kontzertatuen arreta jaso zuten, eta Osasun Sailak egindako inbertsioa 5.258.804  eurokoa izan zen.

4 iruzkin
  • Faceless avatar thumb 70
    Zerbait esan nahi duzu?… iruzkindu albiste hau
  • @OSIArabaESI
    2018.eko urtarrilak 27

    Comentario de Twitter:
    RT @jdarpon: https://t.co/4y2BciYISO

  • @OSIArabaESI
    2018.eko urtarrilak 27

    Comentario de Twitter:
    RT @jdarpon: https://t.co/Dhmy78lLGp

  • @jdarpon
    2018.eko urtarrilak 22
  • @jdarpon
    2018.eko urtarrilak 22
Ekitaldiko kargudunak
Beste gonbidatu batzuk
  • José Manuel Fika -