Berriak Ingurumena, Lurralde Plangintza eta Etxebizitza

3,3 milioi euro bideratuko dira Euskadiko udalerrietako eraikin publiko eta kaleetan irisgarritasuna hobetuko duten plan eta jarduketetarako laguntzetara (Gobernu Bilera 05-09-2017)

2017-09-05

Gobernu Kontseiluak Ingurumen, Lurralde Plangintza eta Etxebizitza sailburuaren Agindua onartu du gaur, udalentzat eta tokiko erakunde txikientzat eta onura publikoko xede sozialak dituzten erakunde pribatuentzat 2017 ekitaldirako diru-laguntzak deitzeko dena, irisgarritasun-planak prestatzeko edo eguneratzeko eta hiri-ingurunean eta eraikuntzetan irisgarritasuna bermatuko duten hobekuntza-obrak gauzatzeko. 

Laguntzen xedea 1997ko Irisgarritasunari buruzko Legea bultzatzea da, eta hauek sustatzeko dira: 1) lehendik dauden hiri-ingurune, espazio publiko, eraikin, garraio eta informazio-sistemak pixkanaka egokitzeko helburua duten irisgarritasun-planak prestatzea eta eguneratzea; 2) udalen eta tokiko erakunde txikien irisgarritasun-planetan aurreikusitako hiri-ingurunean eta eraikuntzetan irisgarritasuna bermatzeko hobekuntza-obrak gauzatzea, eta onura publikoko xede sozialak dituzten erakunde pribatuen kasuan, hobekuntza-obrak gauzatzea, eta 3) egokitze-ekipamendua eskuratzea eta instalatzea, udalen eta tokiko erakunde txikien irisgarritasun-planetan aurreikusitako hiri-ingurunean eta eraikuntzetan irisgarritasuna bermatzeko.

Jarduketa horietara 3,3 milioi euro bideratuko dira guztira. Horietatik, 300.000 euro 2017ko ekitaldi honi dagozkio, 1,8 milioi 2018ari eta 1,2 milioi euro 2019ari. Diru-laguntzen xede diren jarduketak 2017ko urtarriletik aurrera hasi beharko dira, eta horiek gauzatzeko gehieneko epea 2018ko azaroaren 15a da planentzat, eta 2019ko urriaren 31 obrentzat.

Diru-laguntza eskatutako aurrekontuaren % 50ekoa izango da gehienez, irisgarritasun-plan eta horien eguneratzeentzat izan ezik; horientzat, % 75ekoa izango da. Era berean, degradatu gisa deklaratutako edo birgaitze integratuko hiri-inguruen barruan dauden obrek eskatutako aurrekontuaren % 60 izango dute gehienez diruz laguntzeko.

Eskaerak aurkezteko epea bitarteko elektronikoen bidez egin beharko da eta hilabetekoa izango da agindu hau Euskal Herriko Agintaritzaren Aldizkarian argitaratzen den biharamunetik aurrera. Diru-laguntzei buruzko erabakia epe hori ixten denetik sei hileko epean hartuko da gehienez.    

2 iruzkin
  • @arartekomapak
    2017-09-05

    Comentario de Twitter:
    3,3 millones de euros a ayudas para planes y actuaciones que mejoren la #accesibilidad en edificios públicos ... https://t.co/fHcUaifMRM

  • @arartekomapak
    2017-09-05

    Comentario de Twitter:
    3,3 milioi euro bideratuko dira Euskadiko udalerrietako eraikin publiko eta kaleetan #irisgarritasuna hobetuko du... https://t.co/uAIJyrUUL5

Iruzkinak itxita daude dokumentu honetan
Komunikabideek behera kargatzeko