Hirugarren sektore sozialean inplikatutako pertsonen lana aitortu du Lehendakariak

Inbertsioan eta sustapenean oinarritutako politika ekonomikoa defendatzen du Urkullu Lehendakariak uste sendo honekin: “enplegua da politika sozial onena”

Iñigo Urkullu Lehendakaria, Enplegu eta Gizarte Politiketako sailburu Beatriz Artolazabal eta Osasun sailburu Jon Darpón lagun zituela, Sareen Sareak antolatutako jardunaldian izan da Bilboko Itsas Museoan, Hirugarren Sektore Sozialaren Eguna zela eta. Eusko Jaurlaritzak sektore horrekin hartua duen konpromisoa defendatu du Lehendakariak, bere uste sendoa azpimarratuz, hau da, “enplegua da politika sozial onena”. Horixe da Euskadi 2020 Estrategiaren giltzarria, Exekutiboak aste honetan bertan Europako agintarien aurrean aurkeztu duena.

Urkulluk azaldu duenez hazkundearen garaia da, "Euskadin dugun aurrekontuen, ekonomia fiskalaren eta finantzarioaren egonkortasun instituzionalean” oinarritutakoarena. Hala, “Juncker planaren” garapena bultzatzearen alde egin du apustu Eusko Jaurlaritzak, eta inbertsioan eta sustapenean oinarritutako politika ekonomikoa defendatzen du, ekonomia produktiboaren eta enplegu-aukerak sortzearen alde. “Europak gure herrialdearen kaudimena aitortzen du eta oinarri sendo horren gainean, malgutasun-planteamendu bat egin dugu austeritatean”, azaldu du Lehendakariak duela gutxi Bruselara egin duen bisitaldiari buruz, non Europako Batzordeko lehendakari Jean-Claude Junckerrekin bildu den. 

Gaur Bilbon izandako ekitaldia aukera ona izan da Urkullurentzat hirugarren sektore sozialean inplikatutako pertsonen ekarpena aitortzeko eta, gai horretan euskal Exekutiboak aurreikusitako jarduketa-lerroen artean, Hirugarren Sektorearen Sustapen Estrategiaren lanketa nabarmendu du, 2020ko ikuspegiarekin eta zeregin honekin: “euskal gizartean antolatutako ehun soziala, partaidetza eta solidaritatea indartzea”.

ERREKONOZIMENDUA GIZARTE-ERAKUNDEEI

La maravillosa sensación es ser parte-zoragarria da partaide izatea lemapean ospatu nahi izan du Sareen Sareak ekitaldi hau, Hirugarren Sektorearen Eguna dela eta, Euskadiko 3.500dik gora gizarte-erakundeetan lanean diharduten pertsonen zereginari ikusgarritasuna emateko, baita erakunde horien erabiltzaileei ere. Ekitaldi horrek Euskadiko Hirugarren Sektorearen Legea onetsi zeneko lehenengo urteurrena ospatzeko ere balio izan du. Lege horren onespena gertaera gogoangarria izan zen estatu-mailan, erakundeek egindako lanaren errekonozimendu instituzional eta legalean. Gainera, omenaldi bat egin zaio Pedro Fernández Garcíari hirugarren sektorearekin hartutako konpromisoagatik.

Ordezkaritza instituzional, politiko eta sozial zabal eta anitz batek parte hartu du ekitaldian. Hala, bertaratuen artean nabarmentzekoak dira: Legebiltzarreko lehendakari Bakartxo Tejería, Bilboko alkate Juan María Aburto, Itsas Museoko zuzendari Jon Ruigomez, edo Sareen Sareako lehendakari Gonzalo Rodríguez. 

Sareen Sarea erakundeak sare eta erakunde desberdinak biltzen ditu, Hirugarren Sektore Sozialaren eremu desberdinetan lanean dihardutenak. Hona hemen bertako kide diren gizarte-erakundeetako batzuk: Cáritas, ONCE, Gorabide, Gurutze Gorria, Harresiak apurtuz, Lantegi batuak, CEAR, Hirukide edo REAS.