“Turismo-baliabideak dibertsifikatu behar ditugu, eta Euskadi marka balioetsi”, esan du Retortillo sailburuak Expovacaciones azokaren inaugurazioan

• Retortillo sailburuak Euskadi berriz aurkitzera animatu du bertako turista Expovacaciones azokaren inaugurazioan
• “Hazkundearen aukerak kapitalizatu behar ditugu, baina beti turismo jasangarria helburutzat hartuta”, esan du Retortillok.

Turismo, Merkataritza eta Kontsumoko sailburu Alfredo Retortillok gaur goizean inauguratu du bereziki barneko merkatuari zuzendutako Expovacaciones turismo-azoka, eta turismoaren goranzko joera egokia aprobetxatzeko deia egin du.

 Azokari hasiera emateko hitzaldian Retortillok sailaren 2 ardatz ekarri ditu gogora. Lehenengoa izan da turismo-baliabideak dibertsifikatzea, "azokako gure standak eta bertan antolatuko ditugun jarduerek kultura, gastronomia, natura, familiako turismoa eta abar biltzen dituzte bere baitan. Eta, gainera, lurralde-aniztasunaren ikuspegitik egiten dugu, gure hiriburu, lurralde eta eskualde guztiak balioetsita”.

 Retortillok azaldu du turistek gero eta gehiago eskatzen dutela jarduera-mota eta turismo-baliabide ezberdinak bateratu ahal izatea aukeratutako jomugan, eta, era horretara, “lurraldearen dibertsifikazioak aukera ematen du turismo-fluxua banatzeko puntu gutxi batzuetan metatu ordez, horrela eskualde guztiek atera ahal izan diezaioten probetxua turismo-industriari”.

 Sailburuak aipatu duen bigarren ardatza da herrialde marka sendotzea turismoaren gobernantza global baterako, besteak beste, ahalbidetuko duena “baliabide bakoitzaren eta jomuga bakoitzaren balio turistikoa areagotzea osotasunaren balioaren bitartez. Sustapen-ekintzak egiteari uztea da, elkarri bizkarra emango bagenio bezala, eta denok norabide berean arraun egitea.  Horren harira, edizio honetan bat egin dute Euskadiren standak eta Bilbo-Bizkaiaren stand espezifikoak", ñabartu du.

 Hazten ari garen une honetan, Retortillok dei egin du “turismoaren goranzko joera egokia aprobetxatzeko, hazkunde horrek ekar ditzakeen aukera guztiak kapitalizatuz, baina beti turismo jasangarria helburutzat hartuta”.