Eusko Jaurlaritzak papera kendu du Euskadin erregistratutako elkarteekin duen harremanean

• Lehen 3.000 euskal elkarteek sarbide-gako bat dute, orain, online erregistroan sartzeko eta beharrezko izapide guztiak egiteko: eraketa, estatutuak aldatzea, zuzendaritza-batzordearen osaera aldatzea eta abar.
• Eusko Jaurlaritzak 6,1 milioi euro inbertituko ditu, 2017an, www.euskadi.eus web orriaren bidez osorik elektronikoa izango den administrazio publiko baterantz aurrera egiteko.
  

Euskadiko elkarteek online jarduteko behar dituzten gakoak eta jarraibideak bidaltzen hasi da Eusko Jaurlaritza, erregistroan agertzen diren 24.000 elkarteekin duen harremanetik papera kentzeko. Hasierako fase honetan, Jaurlaritzak, lehen 3.000 elkarteekin kontaktatu du, eta datozen hilabeteetan, beste guztiengana heltzeko asmoa du.

Harreman elektroniko hori gauzatu ahal izateko, Eusko Jaurlaritzak beharrezko tresna eta baliabide teknologiko guztiak jarri ditu elkarteen eskura. Hala, “Elkarteen Erregistro Orokorra”, erregistromoderno bat, sortu da web orrian, izapide guztiak egin ahal izateko: elkarteak eratu, estatutuak aldatu, zuzendaritza-batzordearen osaera aldatu eta abar.

Hemendik aurrera, erregistro berritzaile honetan, elkarteek burutu nahi dituzten izapide guztiak, online egiteko aukera izango dute, web orri honen bidez: www.euskadi.eus. “Zero paper” helburuaren bidean, urrats berri bat da hau, zalantzarik gabe.  

KONPROMISOA ZERO PAPERAREKIN

Toki Administrazioekiko Harremanetarako eta Erregistroetako Zuzendari Elixabete Etxanobek azaldu duenez, “aurrerapauso garrantzitsua eman dugu orain “zero paper” helburuan, herritarren eta Eusko Jaurlaritzaren arteko harremanean. Hemendik aurrera, eraginkorragoa eta errazagoa izango da harreman hori, eta nabarmen aurreztuko dugu informazioaren kudeaketan eta prozesamenduan”.

Zentzu horretan, Elixabete Etxanobek azaldu duenez, “asmoa da ekintza hau, gainerako elkarteei ezezik, administrazio erregistroak osatzen dituzten entitateei ere zabaltzea da, hau da, fundazio eta elkargo profesionalei”. Helburua da “nahitaez on line tramitatu behar izango duten data heltzean, hau da 2018ko urria baino lehen, ohituta egotea eta baliabide guztiak edukitzea”.

ADMINISTRAZIO ELEKTRONIKOA

Eusko Jaurlaritzak 6,1 milioi euro inbertituko ditu, 2017an, www.euskadi.eus web orriaren bidez osorik elektronikoa izango den administrazio publiko baterantz aurrera egiteko.