Euskadik bere eskaintza aberatsa erakutsi du Berlingo ITB Azokan

Euskadi Berlingo ITB Azokan da bertako turismo-baliabideak erakusteko hiru lurraldeetako erakundeen eta enpresen agertoki den standean. Turismo, Merkataritza eta Kontsumoko sailburu Alfredo Rertortillok azpimarratu du “Euskadin ez dago distantzia handirik, eta, hala ere, oso lurralde aberatsa da turismo-eskaintza anitzari eta erakargarriari esker”.

Aniztasun horren lagin bat aurkeztu dute erakundeek bigarren jardunaldi honetan. Arabaren ordezkariak izan dira Vitoria-Gasteiz Turismoa, Arabako Foru Aldundia eta Ardoaren Ibilbidea, eta aurkeztu dituzte Vitoria-Gasteiz Green Capital moduan, Arabako Errioxako ondare enogastronomikoa eta Alemaniako merkatura zuzenean bideratutako produktuak, hala nola, autokarabana turismoa eta bide berdeak.

Bestalde, Bizkaiaren ordezkariak Bilbo Turismoa eta Bizkaiko Foru Aldundia izan dira, eta urdintasunaren eta berdetasunaren arteko, kostaldearen eta mendiko eta naturako turismoa eskaintzen dituen barnealdearen arteko kontrastea aurkeztu dute. Bilboren aberastasun kulturalak eta gastronomiak ere garrantzizko lekua izan dute Bizkaiaren eskaintzan.  

Gipuzkoako Lurraldearen ordezkariak Donostia Turismoa eta San Sebastian Region izan dira, Donostia izan dute ardatz eta hiri gastronomiko, 2016ko Kultura Hiriburu eta kirolaren eta MICE turismoaren hiri gisa aurkeztu dute. Kostaldeko ibilbide ederrak, kirolak, paisaia deigarriak eta erosketa-turismoa dira lurraldeak egiten dituen iradokizunetako batzuk nazioarteko turismo azokarik garrantzitsuenetako batean.