Lehendakaria buru izan da Bikain Ziurtagirien banaketan

Iñigo Urkullu lehendakariak Donostiako Kursaal Jauregian banatu ditu gaur Hizkuntza Kudeaketako Bikain Ziurtagiriak. Guztira 52 erakundek jaso dute ziurtagiri hori, lanbide-esparruan eta enpresan euskararen presentzia eta erabilera aitortzen duena.Bere hitzetan, lehendakariak Bikainek aurten izan duen jauzia azpimarratu du. Izan ere, bost aldiz biderkatu da kalitate-ziurtagiri hori lortu duen pertsona kopurua; hortaz, Eusko Jaurlaritzaren konpromisoa adierazi du aurrerapen positibo horri eusteko aukera emango duten neurriak planteatzen jarraitzeko.

Ziurtagiri horiek banatzeko ekitaldira joan dira, baita ere, Kultura eta Hizkuntza Politika sailburu Bingen Zupiria, Enplegu eta Gizarte Politika sailburu Beatriz Artolazabal, Osasun sailburu Jon Darpon eta Hizkuntza Politika sailburuorde Patxi Baztarrika eta Confebaskeko lehendakari Roberto Larrañaga.

Aurten guztira 21.500 langile barnean hartzen dituzten 52 enpresek jaso dute aitorpen hori, aurreko edizioetan baino bost aldiz gehiago, jauzi garrantzitsu bat “bide onetik” aurreratzen ari dela ondorioztatzeko, lehendakariak ziurtatu duenez. Hala ere, Urkulluk, autoatseginean erortzetik urrun, uste du Eusko Jaurlaritzak arrakasta-dinamikak analizatzen jarraitu behar duela, hori baita hain zuzen Euslan programaren helburua, eta aurrerapen horri eusteko enpresaren konpromisoa duten neurriak planteatzen.

Bikain Kanpo-Ebaluazioak Eusko Jaurlaritzak antolatzen ditu Euskalit Bikaintasunerako Euskal Fundazioarekin lankidetzan, eta erakunde batean euskararen erabilera, presentzia eta kudeaketa neurtzera daude zuzenduak.  Bikain Euskararen Kalitate Ziurtagiria ofiziala, publikoa eta doakoa da, eta hiru maila hartzen ditu bere baitan: oinarrizkoa (200 puntu gutxienez); tarteko maila edo zilarrezkoa (400 puntu gutxienez) eta goi maila edo urrezkoa  (700 puntu gutxienez). 

Bikain kanpo-ebaluazio bat egin ondoren eskura daitekeen ziurtagiria da. Ebaluazio horretan EMEk (Erreferentzia Marko Estandarrak) zehaztutako alorretan euskararen presentzia, erabilera eta, oro har, kudeaketa neurtzen da. Ebaluatzen diren alorrak hauek dira:

• Erakundearen komunikazioa eta irudi korporatiboa
• Kanpo harremanak
• Kanpo harremanak
• Barne harremanak
• Hizkuntza kudeaketa 

Kanpo-ebaluazio horiek Bikain Ebaluatzaileen Klubeko kideek egiten dituzte era altruistan.Ebaluatzaile horiek lan-sektore askotarikoak dira, baita eskala diferentetakoak ere, zuzendaritza-mailakoetatik hasi eta tartekoetatik jarraituta, maila ohikoagoetaraino.

BIKAIN  Ziurtagiriaren zuzendaritza organoetan, Eusko Jaurlaritzako Hizkuntza Politikarako sailburuordea batzordeburu dela, EAEko enpresarien elkarteak (CONFEBASK, SEA, CEBEK eta ADEGI), Euskadiko Kooperatiben Konfederazioa, hiru foru aldundiak, Euskalit, Euskaltzaindia eta EUDEL biltzen dira.

(*) Hemen irakurri dezakezu oharra