Berdintasuna lantzeko enpresen arteko sare bat sortzeko pausoak ematen ari da Emakunde

Emakundek "Berdintasunaren aldeko aliantzak" izenburuko jardunaldia antolatu du gaur goizean Arabako Gurutze Gorriko egoitzan. Bertan bildu dira Berdintasunerako Erakunde laguntzaile diren hainbat enpresa eta entitate ezberdinetako ordezkariak. Helburua, entitate ezberdinen arteko sare bat eraikitzea, eta sare honekin lortu nahi  da entitate edo enpresa bakoitzean martxan jarri diren berdintasun planek gizartean duten inpaktua biderkatzea. Eta gainera erantzuten dio entitate eta enpresek beti izan duten eskari bati, hau da, beraien arteko harremanak indartzearen eskariari.

Jardunaldian, AZ Participación, Ortzadar eta Transporte Pesa enpresek beraien esperientziak azaldu dituzte berdintasunaren alorrean  eta ondoren entitate ezberdinen arteko eztabaida ireki da.  .

Izaskun Landaidak, Emakundeko zuzendariak, gogoratu du enpresetan (eta bestelako erakundeetan ere) berdintasuna egotea "lehenik eta behin justizia sozialak eskatzen duen zerbait dela, eskubide bat, baina horretaz gainera, berdintasuna badela ere bikaintasuna lortzeko bide bat".  Enpresetan eta edozein entitate zein erakundetan berdintasun-politikak ezarriz, esan du Landaidak, "erakunde horren kudeaketako beste eredu batzuk sartzen ari gara,  eta hauek mesedegarriak dira erakunde horretako kide guztientzako, eta baita erakundea berarentzako ere, eraginkorragoa bihurtzen baita".