Europar Batasunaren txosten batek Urdaibaiko ekosistemen zerbitzuen garrantzia aitortzen du

• Europar Batasunaren MAES ekimenak, ekosistemak eta horien zerbitzuak ebaluatu eta kartografiatzekoak, Urdaibaiko Biosfera Erreserban egindako lan zientifikoa aitortzen du

Urdaibaiko Biosfera Erreserbako ekosistemen zerbitzuen kartografiaren azterketa hautatu dute ikerketa kasuen artean baso-sistemen zerbitzuei buruzko azkeneko MAES txostenean. Euskadiko Ekosistemen Zerbitzuen Ebaluazioa egitasmoaren esparruan Garapen Iraunkorra eta Ingurumen Hezkuntzari buruzko UPV/EHUko UNESCO Katedrak egindako lan zientifikoa da.

MAES Europar Batasunaren ekimena da, 2020 Biodibertsitate Estrategiako 5. Ekintza betez ekosistemak eta horien zerbitzuak ebaluatu eta kartografiatzea xede duena. Europako ekimen garrantzitsu horrek komunitate zientifikoaren elkarlana sustatzen du eta ekosistemen biodibertsitate eta zerbitzuei buruzko ikerketen emaitzak hartzen diren erabakietan eta ezartzen diren politiketan jasotzen ahalegintzen da.

MAESen argitalpenak Urdaibaiko azterketaren garrantzia azpimarratzen du. Azterketa horrek biodibertsitateak, karbono-metaketak eta ur-emariaren erregulazioak ematen dituzten zerbitzuen arteko erlazio espaziala aztertzen du. Emaitzek erakusten dute Erreserbaren azaleraren zatirik handiena, ia % 90, garrantzitsua dela ekosistemen zerbitzuak sortzeko. Halaber, emaitzek erakusten dute baso naturalak funtsezkoak direla biodibertsitaterako eta ekosistemen zerbitzuen hornidurarako. Txostena eskura dago MAESen web-orrian (http://biodiversity.europa.eu/maes), hain zuzen ere esteka honetan: http://catalogue.biodiversity.europa.eu/uploads/document/file/1329/JRC_MAES_Forest_Report_2016.pdf

Azterketa horren ondoren, ekosistemen beste zerbitzu batzuk sartu ziren analisian, esaterako, aisialdia, gozamen estetikoa edo polinizazioa, baso naturalak babesteko argudioak indartuz. Informazio hori guztia kontuan hartu da Urdaibaiko Biosfera Erreserbaren Erabilera eta Kudeaketarako Plan Gidari berriaren berrikuspenean. Berrikuspena alegazioak aztertzeko fasean dago orain. Urdaibaiko Biosfera Erreserbaren Erabilera eta Kudeaketarako Plan Gidari berriak nukleoa edo tanpoi babes kategoria berri bat barneratzen du baso naturalentzako.