Erkorekak positibotzat jo du legegintzaldi honetan Eusko Jaurlaritzaren eta Fiskaltzaren arteko koordinazio-batzorde mistoak egindako lana

• Fiskaltzaren digitalizazioa, Biktimaren Estatu berria eta Prozedura Kriminalaren Legearen aldaketa aztertu dituzte besteak beste, eta bitartekaritza intrajudizialak Euskadin emandako emaitzen balantzea ere egin dute.

Juan Calparsoro Euskal Autonomia Erkidegoko fiskal nagusia eta Josu Erkoreka Herri Administrazio eta Justiziako sailburua izan ditu buru gaur goizean Bilboko Justizia Jauregian egindako Koordinazioko Batzorde Mistoaren bilerak. Erkorekak adierazi du batzordeak egindako lanaren balantzea positiboa dela, eta nabarmendu duenez, legegintzaldi honetan, Eusko Jaurlaritza eta Fiskaltza «leialtasunez, zintzotasunez, arin eta eraginkortasunez» jardun dira.

Topaketan, besteak beste, honako gai hauek jorratu dituzte:

Fiskaltzaren digitalizazioa: EAEko Fiskaltzan eta epaitegietan jakinarazpen elektronikoak eta espediente digitala ezartzeko prozesuaren egoera.

Aldaketa arauemaile garrantzitsuak: Biktimaren Estatutuaren 4/2015 Legearen onarpenak eta Prozedura Kriminalaren Legearen aldaketak Fiskaltzaren zerbitzuetan eta instrukzioa amaitzeko epeetan izango dituen eraginak.

Bitartekaritza intrajudizialeko zerbitzua: Euskadin bitartekaritza intrajudizialak bizi duen egoeraren balorazio eta balantzea (*).

BILERAN IZAN DIRENAK

Bileran, Juan Calparsororekin batera, Fiskaltzaren honako ordezkariek ere hartu dute parte: José Luis Bueren, Auzitegi Goreneko Gobernu Salako fiskala; Esmeralda Rasillo, Estatuko Fiskaltza Nagusiaren Babes Unitateko salako fiskala; Carmen Adán del Río, Bizkaiko fiskalburua; Jesús María Izaguirre, Arabako fiskalburua; eta Jaime Goyena, Gipuzkoako fiskalburua.

Eusko Jaurlaritzaren izenean, berriz, Josu Erkorekarekin batera honakoek ere hartu dute parte bileran: Ana Agirre, Justiziako sailburuordea; Manuel Valín, Justiziako zuzendaria, eta Jon Uriarte, Justizia Administrazioko zuzendaria.