Lehendakaria: «Arabako Unibertsitate Ospitaleko zentro oftalmologiko berriari esker, arabarrek punta-puntako zerbitzua jasoko dute, prestazio-zorro bikainarekin»

Lehendakariak 1.000 m²-tik gora dituen osasun-azpiegitura berria bisitatu du gaur; Azterketak egiteko eta tratamendua emateko teknologiarik berriena du, eta Eusko Jaurlaritzak 1,5 milioi euro baino gehiago inbertitu ditu

Iñigo Urkullu lehendakariak Arabako Unibertsitate Ospitaleko Zentro Oftalmologiko berria bisitatu du gaur goizean. Zentro berriari esker, arabarrek punta-puntako zerbitzua jasoko dute, prestazio zorro bikain batez osatuta.

Urkullu lehendakaria Jon Darpón Osasuneko sailburuarekin batera joan da osasun-azpiegitura berriaren inauguraziora. «Beste urrats bat eman dugu gorantz Eusko Jaurlaritzak abiarazitako modernizazio- eta berregituratze-prozesuan, Euskadiko herritarren osasuna hobetuko duen kalitatezko arreta integrala bermatzeko», adierazi du Urkulluk inaugurazioan.

Zentro berriak mila metro koadro baino gehiago ditu, eta azterketak egiteko eta tratamenduak emateko teknikarik modernoenez hornituta dago; horiei esker, pazienteen eta profesionalen segurtasuna, eraginkortasuna eta erosotasuna nabarmen handituko dira. Eusko Jaurlaritzak 1,5 milioi euro baino gehiago inbertitu ditu.

Hain zuzen ere, Urkullu lehendakariak AUOko eta Osakidetzako kudeatzaileen eta langileen profesionaltasuna eta jardun ona nabarmendu ditu, bere esanetan ezinbestekoak baitira Euskadiko Osasun Sistema Publikoa maila guztietan erreferente izateko, are gehiago, eskaeraren eta, ondorioz, osasun-jardueraren hazkundea kontuan hartuta.

Berrikuntzen artean, erositako teknologia berria aipagai da. Hauen artean:

• begiak aztertzeko bi kabineteak, erabat konputerizatuta eta Osakidetzaren komunikazio-sistema informatizatuan (Osabide Global) txertatuta baitaude
• malko-bidearen patologia kontrolatzeko endoskopio bat
• angiografo integratua duen koherentzia optikoko tomografoa eta honen bidez, pazienteek ez dute bena barneko txerto koloratzailerik beharko; beraz, prozesua seguruagoa, erosoagoa eta azkarragoa izango da.
• ikusmen txikia aztertzeko materiala.

Zerbitzuaren antolaketari dagokionez, AUOko Oftalmologia Zerbitzuak modu koordinatuan banatuko du jarduera eta horrela, hemendik aurrera, arabatarrek ez dute beharko Gasteiztik kanpo atendituak izatea, zerbitzu osoa AUOan eskainiko bait zaie.

Horrela, bai Kanpo Kontsultetan eta baita Santiagon ere, kontsultak eta azterketa orokorrak atendituko dira eta gainera, Santiagon,patologia zehatzak eta Urgentziak atendituko dira. Zehazki, Bake kalean dagoen Santiagoko  eraikinean: katarata, glaukoma, erretina, betazalak eta malko-bideak, eta ume-patologia atendituko dira. Orotara, astean 1.300 paziente baino gehiago atendituko dituzte goizez eta arratsaldez

Bestalde, Arabako Unibertsitate Ospitaleko Kanpo Kontsulten eraikineko bigarren solairuan oftalmologia orokorreko kontsultak eta probak egingo dituzte, goiz eta arratsaldez ere.