Eusko Jaurlaritzak Euskadiko Lanbide Heziketaren Lege-proiektua onartu du

• Gobernu-Kontseiluak bi legeren aurka konstituzio-kontrakotasuneko errekurtsoak jartzea onartu du
• Errezeta elektronikoaren ezarpena abian da Euskadiko zaharren egoitzetan eta egoitza soziosanitarioetan

Gobernu Kontseiluak Hezkuntza, Hizkuntza Politika eta Kultura sailburuaren proposamenez, Euskadiko Lanbide Heziketaren Lege-proiektua onartu du gaurko bileran. Onartu den Lege-proiektu honen helburua zera da: Euskadiko Lanbide Heziketaren eraldaketa estrategikoa abiaraztea. Eraldaketa horrek arau-esparru fidagarri, zabal eta zorrotza behar du: helburu konplexuak lortzeko bidean aurrera egiteko aukera emango duen esparru bat, hartara, enpresa eta enpleguaren premia berrietara egokitu ahal izateko, Cristina Uriarte sailburuak azaldu duenez.

Proiektu landua da oso, eta Lanbide Heziketako Euskal Kontseiluaren barruko patroi nahiz sindikatuen arteko adostasuna lortu du, bai eta Lanbide Heziketako zentroena ere. Era berean, akordioa lortu da Enplegu Sailarekin eta Ekonomiaren Garapen eta Lehiakortasun Sailekoekin ere, bai eta Lanbiderekin eta Foru Aldundiekin ere. Azken horiek egindako ekarpenak eta agertutako lankidetza lagungarri izan dira gaur onartu den Lege-proiektuaren azken testua hobetzeko.

Besteak beste, Lanbide Heziketako eredu berri bat ezartzen du Euskadin: Prestakuntza Integratuko, Berrikuntza Aplikatuko eta Ekintzailetza Aktiboko Eredu Konbinatu bat hain zuzen.

KONSTITUZIO AUZITEGIAN AURKEZTUTAKO ERREKURTSOAK

Gainera, Gobernu-kontseiluak lege hauen aurka konstituzio-kontrakotasuneko bi errekurtso berri jartzea onartu du gaur: 47/2015 Legea, urriaren 21ekoa, itsas eta arrantza-sektoreko langileen babes soziala arautzen duena, eta 15/2015 Legea, urriaren 16koa, Konstituzio Auzitegiari buruzko urriaren 3ko 2/1979 Lege Organikoa erreformatzekoa, Konstituzio Auzitegiaren ebazpenak bete daitezen, zuzenbidezko estatuaren berme gisa.

Josu Erkoreka bozeramaileak esan duenez, beste behin ere Espainiako gobernuak bere eskudantziaren mugak gainditu ditu, inongo beharrik eta proportziorik gabe, euskal eskumenak inbaditu ditu, eta nahita, Gernikako Estatutua gutxietsi eta bete gabe utzi du. Eusko Jaurlaritzaren ustez, erreformaren bitartez, Espainiako Gobernuak “are gehiago hondatu du Konstituzio Auzitegiaren irudia”. “Politizatu egin du, Konstituzioaren funtsezko balioetan aldarrikatzen den pluralismoan oinarritutako bizikidetza-moldeak baztertuko dituen Estatu eredu baten alde”, adierazi du Erkorekak.

ERREZETA ELEKTRONIKOA EGOITZETAN

Bestalde, bi urte igaro dira Euskadin errezeta elektronikoa edo e-rezeta ezarri zenetik eta tarte horretan 65 milioi errezeta baino gehiago agindu dira.  Orain, garapena eta hedadura koska bat handitu dira abian jarri baita errezetaren ezarpena Euskadiko zaharren egoitzetan eta egoitza soziosanitarioetan, Osasuneko sailburu Jon Darpónek gobernu-kontseiluan gaur jakinarazi duenez.

Errezeta elektronikoaren oso hedatuta dago Osakidetzan, euskal farmazia-bulegoetan eta herritarren artean, eskaintzen dituen segurtasuna, eskuragarritasuna, gardentasuna eta eraginkortasuna kontuan hartuta. Hala, Euskadiko 827 farmaziek eta 23 botikinek, batez bestean, egunean 100.000tik gora errezeta elektroniko eman zituzten astegunetan; izan ere, ematen diren errezeten % 95 elektronikoak dira.

BESTE GAI BATZUK

Halaber, kazetariek galdetuta, Erkorekak berriz egin dio erreferentzia iragan abenduaren 20ko hauteskunde orokorren ostean sortutako egoerari eta alderdiek beren arteko gobernagarritasun-akordioak lortu nahian abiarazi berri duten bideari. Eusko Jaurlaritzako eledunak berriro adierazi du alderdiena dela elkar-ulermenera iristeko zeregina, eta gobernuak ez duela alde batera edo bestera jarrerarik hartuko; nolanahi ere, deitoratu egin du zenbait alderdik lerro gorriak eta betoak ezarri izana, hain justu, akordioak bilatzeko garaia denean.

Iñigo Urkullu lehendakariaren eta Artur Mas presidentearen larunbateko bilerari dagokionez, Erkorekak berriro esan du Euskadiko eta Kataluniako gaur egungo gobernuek elkar ulertzeko nahia dutela.

Gai-zerrenda (2015/12/29)

Eusko Jaurlaritzaren Kontseiluak hartutako erabaki nagusiak (2015/12/29)