Eusko Jaurlaritzak 2016an 22 udalerritan sektoreko berrikuntza sustatzen jardungo duten merkataritza-teknikarientzako bekak banatuko ditu

 Merkataritza eta Turismoko sailburuorde Itziar Epalzak bihar emango dizkie tituluak merkataritza dinamizatzeko teknika berrietan prestatutako 26 gazteei.

Eusko Jaurlaritzak 28 beka banatuko ditu bihar merkataritza-teknikari titulua duten gazteen artean; 2016an, Euskadiko elkarte, plataforma eta udaletan lanean jardungo dute, euskal merkataritza berritzeko baldintza onuragarriak sortzen. Gazteek Bizkaiko 16 gunetan, Gipuzkoako 7 gunetan eta Arabako 3 gunetan beteko dituzte haien zereginak.

Merkataritza sektoreko profesionalak prestatzea da beken xedea: sektorearen egitura eta bilakaera ondo ezagutuko dituzten profesionalak, erabat dinamikoa eta etengabe eboluzioan den ingurune batean agertutako orori irekiak. Haien gaikuntza Eusko Jaurlaritzaren apustuaren parte da. Helburua da toki-merkataritza babesteko tresnak eskain ditzatela, sektorearen profesionalizazioa bermatzeko moduan.

Azkuna Zentroa – Alhóndiga Bilbaon egingo den ekitaldian 2015eko Merkataritza Sariak parte hartuko dute: Itziar Olaizola, Ekobelargi enpresakoa, Merkataritza Lankidetzaren 2015eko Merkataritza Saria; Teresa Busto, Merkataritza Berrikuntzaren 2015eko Merkataritza Saria; Txintxu San Martin, Zuloa Irudiakoa, Hiri-inguruneak Dinamizatzearen 2015eko Merkataritza Saria; eta Eduardo Bizkarra, Bizkarra okindegi eta gozotegien sortzailea, Lan Ibilbidearen 2015eko Merkataritza Saria. Haiek guztiek beren ikuspegia eta eskarmentua eskainiko dute, bekadunekin egindako mahai-inguru batean.

Ekitaldian, Itziar Epalza sailburuordeak gogoraraziko du zein garrantzitsua den sektorea babesteko ekimen zehatzak egitea, eta etengabe berritzeko eta hobetzeko mezua helaraziko die etorkizuneko profesionalei.