Lehendakaria euskararen nazioarteko egunaren ekitaldi nagusian buru izan da

Euskaldun berriari aitorpena egin zaio ekitaldian

Euskararen Nazioarteko Egunaren ekitaldi nagusia gaur ospatu da Donostiako Tabakalera Kultura Garaikidearen Nazioarteko Zentroan, Iñigo Urkullu Lehendakaria buru zela. Ekitaldian, euskaldun berria omendu da. Euskal gizartearen ordezkaritza zabala hurbildu da gaur arratsaldeko ekitaldira.

Euskararen Nazioarteko Egunaren adierazpen instituzionala era bateratuan onartu eta idatzi da aurten. Izan ere, HAKOBAko kide diren Eusko Jaurlaritzaren, Arabako Foru Aldundiaren, Bizkaiko Foru Aldundiaren, Gipuzkoako Foru Aldundiren, Bilboko Udalaren, Donostiako Udalaren, Gasteizko Udalaren eta EUDEL-en artean adostu eta idatzi da testua.

Ekitaldian, euskaldun berrien ekarpena aitortzeaz gain, Gabriel Aresti euskal idazle eta poeta zena omendu da. Hezkuntza, Hizkuntza Politika eta Kulturako sailburu Cristina Uriartek oroigarria eman die Arestiren alargun Amelia Estebani eta Arestiren alaba Andere Arestiri.

Gainera, bideo baten bitartez, gizartean pertsona ezagunak diren eta egun batean euskara ikastea erabaki zuten zenbait euskaldun berriren testigantzak entzuteko aukera ere egon da ekitaldian. Beraiek guztiek euren esperientzia partekatu nahi izan dute. Kukai dantza taldeak eta Oreka TX musika taldeak emanaldiak eskaini dituzte ekitaldi nagusi honetan.

Ordezkaritza instituzional zabal bat ere (Legebiltzarreko Presidente Bakartxo Tejeria, Araba, Gipuzkoa eta Bizkaiko Ahaldun Nagusiak, Donostiako alkate Eneko Goia, Eusko Jaurlaritzako sailburuak) Tabakalera Zentrora hurbildu da gaur arratsaldean. Hauetaz gain, kultura, kirola nahiz gizarteko hainbat ordezkari ere hurbildu dira Euskararen Nazioarteko Egunaren ekitaldi nagusira.