Berriak Segurtasuna

Segurtasun Sailak alerta laranja ezarri du, etengabeko prezipitazioengatik, Gipuzkoako ekialdean soilik

2015-11-25

Gipuzkoako gainerako zonaldeetan eta Bizkaian abisu horia egongo da oraindik, etengabeko prezipitazioengatik

Eusko Jaurlaritzaren Segurtasun Sailak etengabeko prezipitazioengatiko alerta laranja aktibatu du gaurko 24:00ak arte, Gipuzkoako ekialdean soilik, bereziki Urumearen goi-arroan; Gipuzkoako gainerako zonaldeetan eta Bizkaian etengabeko prezipitazioengatiko abisu horiak indarrean jarraituko du.

Euskalmet - Euskal Meteorologia Agentziaren arabera, gaur, hilak 25, eguraldi gozakaitza espero da, eta haize gogorra eta prezipitazio ugari izango dira. Ipar-mendebaldeko haize bizia izango da, eta gogor joko du egun osoan zehar. Itsasoaren egoerak, ondorioz, okerrera egingo du nabarmen.

Euskalmeten arabera, gaurko egunean zehar prezipitazioak ahul-arinak izango dira, eta etengabeak, kantauriar isurialdean bereziki; han, 60 l/m² ere pilatuko dira egunean zehar, Bizkaiko ekialdean eta Gipuzkoan.

Fronteak, gainera, Gipuzkoako ekialdeari erasango dio bereziki: 80 l/m² ere pilatuko dira han, eta Urumea ibaiaren goi-arroan 100 l/m² baino gehiago espero da.

Hain zuzen ere, gaurko eguna bukatu arte, batez ere arratsaldean, 40-60 l/m² pilatu daitezke oraindik, eta horrek Gipuzkoa ekialdeko ibaien mailak gora egitea ekarriko du, batez ere Urumearenak.

Ipar-mendebaldeko haizeak indartsu joko du, gaurko egunaren bigarren partean eta bihar, hilak 26, goizaldean, bereziki.

Hain zuzen ere, haizeguneetan 100 km/h-tik gorako haize-boladak espero dira; haizeguneetatik kanpo, 80 km/h-ko boladak espero dira, batez ere itsasertzetik hurbil, Arabako Lautadan eta Arabako Errioxan.

Itsasoaren egoerak okerrera egingo du nabarmen gaurko egunean zehar. Olatuek 4-5 metroko altuera hartuko dute egunaren bigarren partean, eta 6-7 indar-mailako ipar-mendebaldeko haizeak joko du; itsasoaren egoera zakarra izango da ondorioz.

Olatuek, gainera, marea biziekin bat egingo dute gaur arratsaldeko itsasgoran eta biharko, hilaren 26ko, bi itsasgoretan; hori dela eta, itsas kolpe arinak gerta daitezke kostaldean, gainditze-adierazleak maila horiaren atalasetik hurbil baitaude.

Bihar, hilak 26, euria izango dugu berriro, baina metatutako kantitateak askoz txikiagoak izango dira. 30 l/m² inguruan espero dira gehienez kantauriar isurialdeko puntu batzuetan.

Laburbilduz, egun zaila izango da meteorologiari dagokionez. Prezipitazioak izango dira ezaugarririk nabarmenena: 80 l/m²-tik gora Gipuzkoako ekialdean. Ibaien mailak gora egingo du, ondorioz, zonalde horretan.

Prezipitazioekin batera haize gogorra izango dugu, eta eguna, beraz, gozakaitza izango da.

 

Oharra: Eguraldi iragarpenak eta abisuak jarraitzea gomendatzen da, Euskalmeten bidez (http://www.euskalmet.net) eta kasu hauetan, batez ere, Twitter bidez (@Euskalmet).

Iruzkin bat
  • @rgartzia
    2015-11-25

    Comentario de Twitter:
    El Departamento de Seguridad activa la alerta naranja por precipitaciones persistentes solo para la zona este de... https://t.co/IadQ2aqFFs

Iruzkinak itxita daude dokumentu honetan
Komunikabideek behera kargatzeko