Euskadi Lurralde Antolamenduaren Gidalerroak berrikusten hasi da, Euskal Hiria 2015 Kongresuarekin

•           Azaroaren 23 eta 24an izango da Euskal Hiria 2015 Kongresua, Bilbon, eta hainbat gai jorratuko dituzte bertan: esaterako, «Herritarren partaidetza», «Erronka demografikoa», «Generoa eta lurraldea», «Klima-aldaketaren erronka», «Hiri ibilgarria», «Finkatutako hiria» eta «Industria-eremua leheneratzea»

•           Lurralde Antolamenduaren Gidalerroen Berrazterketak, ikuspegi instituzionalak eta LAGak berraztertzeko elementuek ardaztuko dute eztabaida

Vitoria-Gasteiz, 2015eko azaroaren 12 

Euskadik Lurralde Antolamenduaren Gidalerroak (LAG) berraztertzeko parte hartuzko prozesua abiarazi du, azaroaren 23 eta 24an Bilbon egingo den Euskal Hiria Kongresuadela medio. LAGek lurraldea prestatzen dute, espero diren aldaketei erantzuteko gai izan dadin, eta, partaidetza harturik oinarri, behar bezain malguak dira sortzen diren aldagai berriak ere barnehartzeko.

LAGak 1997an onartu ziren, eta Eusko Jaurlaritzaren Kontseiluaren uztailaren 29ko bileran hasi zen, hain zuzen, Euskal Autonomia Erkidegoko LAGak berraztertzeko prozedura. Onartu zirenetik bi hamarkada igaro direnean, berraztertze prozesu bat hasteko une aproposa dela jo du Gobernuak, lurralde antolamenduak planteatzen dituen erronka berriei erantzuteko hartara. Funtsean, parte-hartze prozesu zabal baten oinarriaren gainean bermaturik eraiki behar da, euskal erakunde publiko, eragile sozioekonomiko, politiko eta herritarrekin batera.

Iñigo Urkullu lehendakariak, Bilboko alkate Juan Maria Aburtok, eta Ingurumen eta Lurralde Politikako sailburu Ana Oregik inauguratuko dituzte jardunaldiak, eta lehen mailako profesional eta espezialistak izango dira bertan. Bi egunez, hainbat gairi helduko diote: besteak beste, «Herritarren partaidetza», «Erronka demografikoa», «Generoa eta lurraldea», «Klima aldaketaren erronka», «Hiri ibilgarrien kontzeptua», «Finkatutako hiria» eta «Industria-eremua leheneratzea». Lurralde Antolamenduaren Gidalerroen (LAG) Berrazterketak eta LAGak berraztertzeko ikuspegi instituzionalak ardaztuko dute eztabaida.

Eusko Jaurlaritza lanean da, Izaskun Iriartek zuzentzen duen sailburuordetzaren bitartez, lurralde-antolamenduaren esparruan parte hartuzko kultura bat finkatzeko. Horretarako, lurraldearen ikuspuntutik hausnartzeko apropos jotzen den auzi sorta bat prestatu du.

Bi egunez, zeharkako kontuei helduko diete Euskal Hiria 2015 Kongresuan: adibidez, klima-aldaketa, generoa, osasuna eta euskara; baita ingurune fisikoarekin lotutako zenbait gairi ere, esaterako, antolamendua eta erabilera-matrizea eguneratzea, babestutako naturguneak eta Natura 2000 sarea, azpiegitura berdeak, ekosistemetako zerbitzuak eta paisaia; mugikortasuna, ura eta energia; landa-ingurunea eta hiri-ingurunea, arreta berezia jarrita honako hauetan: hiria berroneratzea, metropoli-eremuak eta eraldaketa-ardatzak, hiri-hazkundearen perimetroa, bizitegien kuantifikazioa eta jarduera ekonomikoen lurralde-jasangarritasuna.

Euskal Hiria Kongresuaren, lurralde-antolamenduaren arloko elkarketarako foro irekiaren, 2015eko edizioan, LAGak berraztertzeko parte hartuzko prozesua abiaraziko da. Jardunaldiek bi egunez iraungo dute, eta Lurralde Antolamenduaren arloan trebatutako hirurehun bat pertsona bertaratuko dira.

Ikusi programa osoa pdf formatuan.