
24. promozioko gizon eta emakumeak gaur sartuko dira Ertzaintzan
Lehendakariak eman dizkie kredentzialak gaur eguerdian Arkauten
Ertzaintzaren 24. promozioa osatzen duten 121 agente berriei kredentzialak eman dizkie gaur Arkauten Iñigo Urkullu lehendakariak; ekitaldi horretan hauek ere parte hartu dute lehendakariarekin batera: Segurtasuneko sailburu Estefanía Beltrán de Herediak, Segurtasuneko eta Administrazio eta Zerbitzuetako sailburuorde Josu Zubiagak eta Iñaki Gurtubaik zein Polizia eta Larrialdietako Euskal Akademiako zuzendari Malentxo Arruabarrenak. Bederatzi hilabeteko oinarrizko prestakuntza-ikastaroa bukatu eta promozio berria gehituta, berriro iritsi da Ertzaintza 8.000 agenteko kopuru ofizialaren ingurura; horri esker batez ere Herritarrak Babesteko Unitateak indartu ahal izango dira.
24. promozioko kideek hautaketa- eta prestakuntza-prozesu luzea gainditu behar izan dute gaurko egunera iristeko. Lehen hautaproba iazko uztailaren 5ean egin zuten 5.405 izangaik, BECen. Ondoren eginiko hainbat azterketa eta kanporaketa-probaren bidez 124ra murriztu zen kopuru hori, eta horiexek sartu ziren abenduaren 15ean Polizia eta Larrialdietako Euskal Akademian ia bederatzi hilabeteko oinarrizko prestakuntza-ikastaro bat egiteko.
BELAUNALDI-ERREGENERAZIOA ERTZAINTZAN
Ekitaldian, lehendakariak aipatu du Espainiako Gobernuak Ertzaintzaren LEP berriaren aurka jarri duen errekurtsoa, adostutako 8.000 plazak baino gutxiago eskaintzea bilatzen duena. «Gure autogobernuaren oinarriei azpiak jan nahian egiten ari diren birzentralizazio politikan beste urrats bat» dela adierazi du, eta azpimarratu du lan-eskaintza publikoa dela belaunaldi-erregenerazioa gauzatzeko eta Euskadik behar duen segurtasun-zerbitzu integrala ematen jarraitzeko modu bakarra.
Ezker abertzaleari ere mezu bat igorri dio Lehendakariak, ohartarazi baitu egindako min bidegabearen aitortzan oinarrituko dela etorkizuna, eta biktimen ohorea ez dela zokoraturik geratuko iragana ahazten duen etorkizuneranzko begirada baten erruz. «Oroimen-politikek berekin dakarte ETAren bortxakeria bidegabekeria izan zela aitortzea», gaineratu du.
-
2019-07-08
Falta la bandera de España junto a la Ikurriña y la de la Ertzaintza, según nuestra Constitución, http://www.congreso.es/consti/constitucion/indice/titulos/articulos.jsp?ini=4&tipo=2, y en el lugar central entre las dos utilizadas, que es el que le corresponde por ser el de preeminencia y máximo honor , según la ley de banderas, art. 6º, https://www.boe.es/buscar/act.php?id=BOE-A-1981-26082.
-
2015-09-18
Comentario de Twitter:
24. promozioko gizon eta emakumeak gaur sartu dira Ertzaintzan... http://t.co/J4yNUfpu2l