Berriak Lehendakaritza
Eu

Lehendakariak Euskadi Ikerkuntza Saria eman dio Jose Felix Marti Massori

2015.eko ekainak 09

Iñigo Urkullu Lehendakariak, eta Cristina Uriarte Hezkuntza, Hizkuntza Politika eta Kultura sailburuak, 2014ko Euskadi Ikerkuntza Saria eman diote Jose Felix Marti Masso mediku neurologo eta UPV/EHUko ikertzaileari, sariketaren hemeretzigarren edizio honetan. Ekitaldia, Lehendakaritzaren egoitzan burutu da gaur arratsaldez, Gasteizen.  

Euskadi Ikerkuntza Sariak jarduera zientifikoa sustatzea du helburu nagusi, bai eta honako beste hauek ere: Euskal Autonomia Erkidegoko eta Euskal Autonomia Erkidegotik kanpoko ikertzaileek eta talde kualifikatuek egiten dituzten ahaleginak sustatzea eta bultzatzea, horien lanak oso eragin positiboa badu Euskadin. Hezkuntza, Hizkuntza Politika eta Kultura Sailak urtero deitzen du Euskadi Ikerkuntza Saria. Urte bakoitietan, Gizarte-Zientzien eta Humanitateen arlorako egiten da deialdia; urte bikoitietan aldiz, Zientzia eta Teknologia arloko profesionalen lana aitortzen du sariak. 

José Félix Martí Massó (Constantí, Tarragona, 1947) Medikuntzan eta Kirurgian Lizentziatua eta Doktore da Nafarroako Unibertsitatean, Neurologia eta Barne-medikuntzan espezialista. Egun Neurologia Medikuko Irakasle Titularra da Euskal Herriko Unibertsitatean, eta Donostia Unibertsitate Ospitaleko Neurologia eta Neurofisiologia Klinikoko zerbitzuburua, Osakidetzan. 

Bere ikerketa lana aplikatua eta emaitzetara bideratutakoa da batik bat. Alterazio edo erantzun terapeutiko ezohikoak dituzten paziente bereziz osaturiko taldeen behaketan gauzatzen da Marti Massoren ikerketa, hauen behaketak nerbio sistemaren funtzionamendua hobeto ulertzen edo pazienteak hobeto artatzen laguntzen baitu. Horiei guztiei, prospekzio-azterketetan Marti Masso irakasleak duen parte hartzea gehitu behar zaie, bai azterketa epidemiologikoetan, bai azterketa kliniko-terapeutiko eta genetikoetan.

Bereziki nabarmentzekoa da ikerketa traslazionalean eginiko lana, aplikazio klinikoen oinarrizko ikerketa balioesteko funtsezkoa. Bere ibilbidea aitzindaria eta eredugarria izan da alderdi horretan, ikerketa zientifiko aplikatua egungo gizarte ongizatearentzat erronka bihurtu diren arazoetara arrakastaz bideratzen jakin baitu.

Haren lorpen zientifikorik nagusienen artean azpimarratzekoa da sindrome berri baten aurkikuntza, “ Likido zefalorrakideoko pleozitosisdun pseudomigraña”. 

Epaimahaiak zera nabarmendu zuen bere ebazpenean: Marti Masso irakasleak neurologia klinikoaren alorrean egin duen ikerketa aitzindaria, eta bereziki gaixotasun neurodegeneratiboen ikerketan egindako lana, Parkinson gaixotasunaren alderdi genetikoan ekarpen handiak egin dituena. Eremu honetan nabarmentzekoa da, halaber, sistema neuromuskularraren koordinazioan zenbait farmakok dituzten zeharkako efektuei buruzko ikerketa ere.

Era berean, sarituak egin duen formazio-ibilbide luzea ere nabarmendu zuen epaimahaiak, ibilbide horri esker ikerketa kliniko eta traslazionala burutzen duen neurologo eskola inportantea sortu baita.

2 iruzkin
  • Faceless avatar thumb 70
    Zerbait esan nahi duzu?… iruzkindu albiste hau
  • @cicenergigune
    2015.eko ekainak 10

    Comentario de Twitter:
    RT @Network_CIC: José Félix Martí Premio Euskadi de Investigación. Zorionak! http://t.co/p94jRrz6fI

  • @Network_CIC
    2015.eko ekainak 10

    Comentario de Twitter:
    José Félix Martí Premio Euskadi de Investigación. Zorionak! http://t.co/p94jRrz6fI

Ekitaldiko kargudunak
(X legealdia 2012 - 2016)
Beste gonbidatu batzuk
  • José Felix Martí