Ertzaintza Security Forum 2015en izango da

 

Aurtengo ekitaldiaren helburua segurtasunaren alorreko enpresen eta erakundeen jarduerarekin lotutako lau ardatz sustatzera bideratuta dago: jakintza, networkinga, berrikuntza eta negozioa. Horretarako, erakusketa gune bat ipiniko da: bertan, CCTV sistemen eta ekipoen azken berrikuntzak, segurtasun fisikoko sistemen integrazioa, segurtasun logikoa, sarbideen kontrola, eta abar erakutsiko dira. Horrez gain, elkarrizketarako eta berrikuntzak aurkezteko bi espazio ere izango ditu: Elkarrizketa Programa, eta Speak Corner.

Lehendabizikoarekin loturik, kongresuan hainbat mahai-inguru daude programatuta segurtasunari buruz mintzatzeko. Horietako batean, Ertzaintzaren Segurtasun Pribatuaren Unitateko buruak parte hartuko du, Francisco Llanezak. Bigarren espazioan, berriz, berrikuntzak aurkeztuko dituzte. Hor, Lucio Cobos intendenteak parte hartuko du, Erakunde Harremanetarako eta Komunikaziorako buruak, eta Ertzainak herritarrekin harremanetarako zer ekimen dituen martxan azalduko du.

Tradizio handiko ekitaldia

Security Forum ekitaldian mundu zabaleko hirurogeita hamar erakuslek baino gehiagok parte hartuko dute, segurtasunari buruzko Estatutako ekitaldi nagusietako bat da, eta polizia-erakundeetako zein segurtasun pribatuko profesionalentzako topagune da, baita babesarekin, prebentzioarekin eta segurtasun publikoarekin lotutako enpresentzat ere.

Security Forum 2015 ekitaldian, segurtasunaren sektoreko berritasun nagusiak aurkezten dira eta gaiko munduko espezialista asko biltzen dira; hortaz, aukera bikaina da Ertzaintzarentzat informazioa trukatzeko eta ezagutza teknologiko berria eskuratzeko, Euskadiko segurtasun publikoaren mesedetan.