Iktusaren Munduko Eguna

Bihar, urriaren 29an, «Bat egin gurekin iktusaren kontrako borrokan» lelopean, Basurtuko, Donostiako eta Arabako unibertsitate-ospitaleek prebentzio-probak egingo dizkiete nahi duten pertsonei

Iktusa burmuin-zirkulazioko asaldura bortitza da, burmuinaren gune jakin baten funtzioa asaldatzen duena, eta urtero intzidentzia handiagoa du, populazioa gero eta zaharragoa baita

Euskadin, 4.600 iktus-kasu berri erregistratzen dira urtero, eta horiek euskal ospitaleetako neurologia-zerbitzuetan ospitaleratzen direnen erdia dira. Nolanahi ere, prebentzioren, goiz antzematearen eta arreta espezializatua hobetzearen arloan egiten ari garen lan handiari esker, iktusak eragindako heriotza-tasa murrizten ari gara.

Osakidetzak iktusaren bost unitate espezifiko ditu Gurutzetako, Basurtuko eta Galdakaoko ospitaleetan, Bizkaian, Donostiako ospitalean, Gipuzkoan, eta Arabako ospitalean, Araban. Unitateotan, 23 ohe daude.

Unitateon jardunbide egokien adibide gisa, Galdakaoko ospitaleak Estatu osoko egonaldirik txikiena erregistratu du (3,6 egun batez beste), eta, gainera, heriotza-tasa txikienetako bat du (4,4koa 2013an).

Bestalde, Basurtuko Unibertsitate Ospitaleak karotidaren patologia-unitate bat du. Diziplina anitzeko unitate berdingabea da Estatuan, eta konplexutasun kliniko handiko karotida-estenosia duten pazienteei tratamendurik onena ematea du helburu.

Urte honetako Iktusaren Munduko Egunean, prebentzioaren garrantzia nabarmendu nahi izan da beste behin: abisu-seinaleak identifikatzen ikastea eta saihesteko nola jardun behar den jakitea. Hori du, bada, oinarri «Bat egin gurekin iktusaren kontrako borrokan» leloak.

Basurtuko, Arabako eta Donostiako ospitaleek informazio-kanpaina honetan parte hartzen dute, gaixotasuna eta hori nola prebenitu ezagutarazteko. Kanpainari jarraiki, zentro bakoitzeko osasun-langileek iktusa prebenitzeko probak egingo dizkiete nahi duten pertsonei; esaterako, arteria-presioa eta gluzemia kontrolatzea eta doppler (ekografia) bat egitea.

Gainera, Osakidetzak iktusari buruzko informazio osoa du bere webgunean (www.osakidetza.net): zer da iktusa, zergatik sortzen da, zer prebentzio-neurri daude, zeintzuk dira alarma-sintomak, eta abar.

Kanpaina hau gaixotasun honen beharrezko eta oinarrizko prebentzio-politikaren barruan sartzen da; izan ere, adituen arabera, beharrezkoa da alda daitezkeen arrisku-faktoreak (hipertentsioa, diabetesa, bihotz-gaixotasunak, fibrilazio aurikularra, alkohol gehiegi kontsumitzea, kolesterola, tabakoa, obesitatea, sindrome metabolikoa eta lo-apnea) ezagutzea eta larrialdietako arreta neurologiko koordinatu eta diziplina anitzekoa izatea. Kanpainaren helburua hurrengo urteetan iktusak eragindako heriotzen tasa % 20 murriztea da. Gainera, epe luzeko helburu gisa, herritarren osasun-hezkuntza hobetu nahi da, eta iktus-kode izenekoa hedatu, ospitaleez kanpoko larrialdiak koordinatu, iktusaren unitateen kopurua handitu eta ikerketa neurobaskular gehiago egin.

INFORMAZIOA JASOTZEKO TOKIAK ETA ORDUTEGIAK

Donostiako Unibertsitate Ospitalea

Begiristain doktorearen pasealekua, 109 – Donostia

Ordutegia: 10:00etatik 15:00etara

Basurtuko Unibertsitate Ospitalea

Montevideo etorbidea, 18 – Bilbo

Ordutegia:09:00etatik 14:00etara

Arabako Unibertsitate Ospitalea

Jose Antxotegi kalea, z.g. – Gasteiz

Ordutegia: 10:00etatik 15:00etara