Lehendakariak Eusko Jaurlaritzaren konpromisoa eskaini du, egonkortasuna, gobernagarritasuna eta adostasuna lortzeko Euskadin

Eusko Jaurlaritzaren Kontseiluak urte politiko berriko lehendabiziko bilkura egin du gaur Donostiako Miramar Jauregian. Martin Garitano Gipuzkoako ahaldun nagusiak, Juan Karlos Izagirre Donostiako alkateak eta Julio Astudillo Gipuzkoako Batzar Nagusietako bigarren presidenteorde eta jarduneko presidenteak hartu dituzte Iñigo Urkullu lehendakaria eta gainontzeko sailburuak. 

Jaurlaritzaren Kontseiluak bilera egin ondoren, lehendakariak komunikabideen aurrean esan du egonkortasuna, gobernagarritasuna eta adostasuna bultzatzea izango dela Eusko Jaurlaritzaren konpromiso instituzionala urte politiko berri honetarako ere,  krisialdian bost urte iragan ondoren hazkundea berreskuratzeko horrela. 

Ildo horretan, lehendakariak adierazi du, krisia bera oraindik gainditu ez bada ere, krisialdiaren gogorrena atzean utzi dugula –hazi egin da BPGa eta hazi egin dira esportazioak (%5,4) 2014ko lehen seihilekoan– eta iragarri du hazkundearen aurreikuspenak gorantz berraztertzeko aukera izan daitekeela laster, nahiz eta zuhurtziaz jokatuko duen.

Lehendakariak baieztatu du Ekonomia eta Enplegua Sustatzeko Programaren emaitzak ikus daitezkeela dagoeneko eta azaldu du 2015eko aurrekontuek pertsonekiko, ekitatearekiko eta enpleguarekiko konpromiso sozialari eutsiko diotela. Gobernuaren aurrekontuak zorroztasunean oinarrituko dira, daukana baino gehiago gastatu gabe.  

Halaber, aldaketa eskatu du Europako politika ekonomikoan –haren esanetan, politika ekonomikoa zorroztasunak gidatu behar du, eta ez austeritateak– eta dei egin du Europa munduko ekonomiaren eragilea izan dadin berriz. 

Bestalde, Urkullu lehendakariak alderdi politikoei eskatu die jarrera ausartagoa eta konpromiso politiko handiagoa izan ditzatela Bakea eta Bizikidetzarekiko, eta ekarpena egiteko eta aurrera egiteko tresna eta aukeratzat jo du Memoriaren eta Bizikidetzaren Institutua sortzeko Legebiltzarreko lantaldeak irailaren 5ean egingo duen bilera. Halaber, poztu egin da kale borrokari buruz uda honetan izan den istilu bakarrak inolako gizarte babesik izan ez duelako eta alderdi politiko guztiek berehala gaitzetsi dutelako.

Mariano Rajoy Espainiako Gobernuko presidentearekin izango duen bileraren inguruan, lehendakariak iragarri du Euskadiri dagozkion gaiak aztertuko dituela berarekin, eta Gernikako Estatutuarekiko duen betetze konpromisoari buruz galdetuko diola.

Azkenik, irailaren 18ko erreferenduma aipatu du lehendakariak, hor erabakiko baitu Eskoziak bere etorkizuna ituna eta demokrazia erabiliz. Lehendakariak adierazi du garrantzizko berri politikoa dela, albiste hona Europarentzat, izan ere egoera politiko berri bat eta aukera bat irekitzen ditu erreferendum horrek. Uste du Eskoziako prozesua eredugarria dela erabili duen metodoarengatik, aldeen arteko akordioan oinarrituta baitago. Hori da hain zuzen lehendakariak Euskadirentzat defendatzen duen eredua: elkarrizketa, negoziazioa, akordioa eta berrespena.