Eusko Jaurlaritzak herritarren galderak Whatsapp bidez erantzungo ditu

• Herritarrei erantzuteko aplikazio ospetsua erabiliko duen lehen autonomia-erkidegoa izango da Euskadi. Herritarrak artatzeko erabiltzen dituen zerbitzuei gehituko zaie, hau da, online zerbitzuari, 012 telefonoari eta hiriburuetako bulegoei.
• Gainera, Eusko Jaurlaritzak mugikorretarako aplikazio bat sortuko du online zerbitzuetarak sarbidea emateko, eta herritarrek parte hartzeko eta politika publikoak balioztatzeko web atari bat sortuko du.
• 2016an Euskadiko Herri Administrazioan sartzen den dokumentazio guztia digitala izango da.

Josu Erkoreka Justizia eta Herri Administrazio sailburuak berrikuntza publikoaren arloko Eusko Jaurlaritzaren 2016rako estrategia aurkeztu du gaur goizean. Aurkezpenean, Javier Bikandi Herritarrak Hartzeko eta Administrazioa Berritzeko eta Hobetzeko zuzendaria eta Christian Bason Danimarkako Gobernuaren Politika Publikoen Berrikuntza Laborategi Mindlabeko zuzendaria ere izan dira.

Gainera, gaur, Eusko Jaurlaritzako kideek hainbat bilera eta mintegi egingo dituzte Christian Basonekin, politika publikoen arloan berrikuntza eta gardentasuna aplikatzeari buruzkoak.

2016KO BERRIKUNTZA PUBLIKOAREN ESTRATEGIA

Eusko Jaurlaritzak berrikuntza publikoari buruzko estrategia bat diseinatu du. 6 jarduera ardatz, 28 proiektu zehatz eta 46 ekintza ditu, eta 2016 urterako landuko eta balioetsiko da.

Honako hauek dira 6 jarduera ardatzak:

• Gardentasuna eta gobernu ona.
• Herritarrekiko interakzioa.
• Antolakuntza-egokitzapena.
• Kudeaketa hobetzea.
• Administrazio elektronikoa.
• Berrikuntza gobernuaren eta herritarren arteko sorrera erabiliz.

28 proiektuen eta 46 ekintzen artean, nabarmentzekoa da Eusko Jaurlaritzak telefono mugikorrak eta tabletak erabiliko dituela herritarrei erantzuteko eta haiekin komunikatzeko tresna moduan, hurbilekoak, azkarrak eta eraginkorrak direlako. Horrenbestez:

• Eusko Jaurlaritza Whatsapp aplikazioa erabiltzen hasiko da herritarren zalantzak eta galderak erantzuteko. Ondorioz, Euskadi herritarrekin komunikatzeko aplikazio hori erabiltzen duen lehen autonomia erkidegoa izango da.
• Eusko Jaurlaritzak mugikorretarako aplikazio bat sortuko du, herritarrak telefono mugikorraren bitartez sarean dauden zerbitzu publikoetan sartu ahal izateko.
• Eusko Jaurlaritzak orain online edo bulegoetara joanda soilik egin daitezkeen izapideak telefono bidez egiteko aukera emango du.

Gainera, berrikuntza publikoko estrategiaren bidez, Eusko Jaurlaritzak herritarrei arreta emateko Zuzenean zerbitzua indartuko du. Duela bost urte sortu zuen arren, dagoeneko hamar erabiltzailetatik zortzik oso pozgarritzat jotzen dute jasotako arreta.

2014ko hilabete hauetan, zerbitzuaren bidez 369.477 kontsulta erantzun dira, hau da, egunean 3.639 inguru. Zuzenean zerbitzuak hiru motatako arreta ematen du, Internet bidezkoa, telefono bidezkoa eta zuzenekoa, Euskadiko hiru hiriburuetan dituen bulegoetan.

Berrikuntza publikoko estrategiak biltzen duen beste erronketako bat da 2016rako papera desagerraraziko dela Herri Administrazioaren kudeaketan eta izapideetan:

• Eusko Jaurlaritzak ez du paperik sartuko Administrazioan. 2016an, Euskadiko Herri Administrazioan sartzen den dokumentazio guztiak digitala izan beharko du. Administrazioan artatzen diren herritarrek dokumentuak paperez eman arren, dokumentuak eskaneatu egingo dira eta paperak izapideak egiten dituztenei itzuliko zaizkie.
• Herritarrek administrazioan egin ditzaketen izapide guztiak online egiteko aukera emango du Eusko Jaurlaritzak.

GARDENTASUNA ETA PARTE HARTZEA

Eusko Jaurlaritzaren berrikuntza publikoko estrategiaren beste helburuetako bat gardentasuna eta herritarren partaidetza eta lankidetza handitzea da. Horretarako, Jaurlaritzak parte hartzeko web ataria sortuko du, herritarrei politika publikoak balioztatzeko aukera emateko.

Gainera, Jaurlaritzak gobernantzaren arloko Europar Batasuneko 25 eskualde onenen zerrendan sartu nahi du, eta bide horretan dago, estatuko lehena baita.