Arantza Tapiak hurrengo hilabeteetan inauguratuko den Oronaren instalazio berrietan izan da

Miramongo teknologia-parkean egongo den ingurune berria Orona IDeO – innovation city deituko da

Eusko Jaurlaritzako Ekonomiaren Garapen eta Lehiakortasuneko  sailburu Arantza Tapiak Oronak Hernanin dituen instalazio berriak bisitatu ditu gaur arratsaldean, Oronako zuzendari nagusi eta Mondragon Korporazioko presidenteorde Javier Mutuberriak gonbidatuta, hurrengo hilabeteetarako aurreikusita dagoen inaugurazioaren aurretik.

Tapiarekin batera, Industriako sailburuorde Juan Ignacio García de Motiloa eta Teknologia, Berrikuntza eta Lehiakortasuneko sailburuorde Estibaliz Hernáez izan dira. Oronako arduradunekin bildu dira, eta horiek Orona Ideo proiektua azaldu diete.

Ikerketa- eta berrikuntza-zentro berri bat, Miramongo teknologia-parkean egongo dena eta datozen hiletan inauguratuko dena.

Orona IDeO – innovation city izena izango du hiri-mugikortasun jasangarri eta buruaski baterako Europako lehen ikerketa- eta berrikuntza-zentroak. 70 milioi euroko inbertsioa izan du, eta dagoeneko eraikitzen ari dira. 40.000 metro koadroko azaleran eraikiko diren eraikinetan, bada, etorkizuneko irisgarritasun- eta mugikortasun-sistemak diseinatuko dira.

Arantza Tapia sailburuak Oronak, erakunde publikoen laguntzarekin,
egindako apustua nabarmendu du; izan ere, balio handiagoa emango dio Miramongo teknologia-parkeari, I+G+b-ren funtsezko aktoreak –hots, enpresak, I+G+b-ko teknologia-zentroak eta unibertsitateak– bateratzen dituen ingurune fisiko bat sortuko baitu.