Lehendakariak ziurtatu du erakunde arteko akordioak «hazteko energia» ematen duela

Iñigo Urkullu lehendakariak esan duenez, «erakundeek elkarlanean lan eginez, norabide berean arraun eginez, herrialdea aurrera aterako da». Gaur, foru aldundiek eta Eusko Jaurlaritzak ekonomia suspertzeko erakunde arteko akordio bat sinatu dute. Urkulluren arabera, «garrantzitsuenean ados gaude». Hain zuzen ere, lehendakariak ziurtatu du erakunde sinatzaileak bat datozela diagnostikoarekin; defizit helburua malgutzeko eta baliabide osagarriak lana sortzera bideratzeko beharrarekin, alegia. Ekonomia suspertzea eta lanpostuak sortzea baitira lehentasunak, lehendakariak ziurtatu duenez.

Iñigo Urkullu lehendakariak eta Araba, Bizkai eta Gipuzkoako ahaldun nagusiek agerraldi bateratua egin dute, Ekonomia Suspertzeko Erakunde arteko Akordioa sinatu ondoren. Hiru ahaldunek hitzarmen horren balioa nabarmendu dute: «akordio garrantzitsua da», De Andrésen ustez; Garitanok baieztatu du erakundeek «arduraz» jokatu dutela eta José Luis Bilbaok «beharrezkoa» zela esan du.  Buruzagi guztien ustez, hitzarmenak ekonomiari bultzada bat emateko eta enplegua sortzeko balioko du.

Lehendakariak hitzarmen hau zer unetan egin duten ere aipatu du; erakundeak 2014rako aurrekontua egiten ari diren garaian, hain zuzen. «Akordio honek akordio gehiago eskatzen dizkigu», adierazi du lehendakariak. Gainera, akordio hau datorren urtean erakundeek eta aurrekontuek egonkortasuna izan dezaten erabiltzeko asmoa duela esan du. Lehendakariak akordioaren alde eginez bukatu du hitzaldia. Izan ere, bere hitzetan, «herritarren eskaria da».