Aburto: "Egin beharreko funtzioetako bat bera ere ez du ondo egiten Lanbidek"

Enpleguko eta Gizarte Politikako sailburu Juan Maria Aburtok esan du Diru-sarrerak Bermatzeko Errentaren kudeaketak Lanbide «jan» egin duela eta lan-bitartekari moduan jarduteari utzarazi diola. Lanbide «birformulatzearen» aldeko agertu da Aburto, eta, besteak beste, Lanbideren eta ekonomia- eta enpresa-bilbearen arteko kontaktua areagotu nahi luke, merkatuan «zer trebakuntza-behar eta –eskaera dauden jakiteko» eta, hartara, merkatu horretan artekari gisa jardun ahal izateko. 

Onda Vasca-ren «Euskadi Hoy» saioan egin ditu Enpleguko eta Gizarte Politikako sailburu Juan Maria Aburtok adierazpen horiek.

Halaber aipatu du Juan Maria Aburtok Diru-sarrerak Bermatzeko Errenta atxiki beharra, eta ez da laguntza hori jasotzeko baldintzak aldatzearen aldeko agertu, hori erabakitzea Legebiltzarrari egokituagatik ere.

Gizarte-eragileekiko elkarrizketa eta hitzarmen posibleei dagokienez, egoera «zaila» dela onartu du Aburto sailburuak; haatik, alde guztiak elkartzeko moduko «mahai» bat antolatzeko moduaren bila dihardutela adierazi du. «Ezin diogu elkarrizketari uko egin, asko baitugu jokoan», gehitu du.