Berriak Enplegua eta Gizarte Politikak

Enplegu eta Gizarte Politikako sailaren lehentasunezko helburua, Euskadin gizarte kohesioari eustea

2013-02-06

Juan María Aburto Eusko Jaurlaritzako Enplegu eta Gizarte Politikako sailburuak legegintzaldi honetarako hiru lehentasun hauek aurkeztu ditu gaur Legebiltzarrean: krisi ekonomikoak enpleguan dituen ondorioak arintzen laguntzeko gizarte-akordioak sustatzea; alokairu sozialeko politika publikoak bultzatzea, eta Gizarte Zerbitzuen Legearen garapen iraunkorra lortzea.

Juan María Aburtok Eusko Legebiltzarreko Enplegu, Gizarte Politika eta Etxebizitzako Batzordearen aurrean adierazi duenez, Euskadik gizarte-kohesioari eutsi dio eta premia-egoeran dauden milaka familiari bizi-kalitateko gutxieneko baldintzak bermatu dizkie azken hamarkadotan, ezarritako gizarte-babeseko sistemei esker. «Uneotan, krisiak irauteak eta diru-sarrera pribatuak zein publikoak murriztu izanak egoera zailean jarri dute euskal gizartea», nabarmendu du sailburuak.

Enplegu eta Gizarte Politikako sailburuak Eusko Jaurlaritzak enpleguaren, gizarte-politikaren eta etxebizitzaren arloetan dituen lehentasunak azaldu ditu.

Enpleguari dagokionez, gizarte-elkarrizketari berriro heltzea da lehentasuna, krisi ekonomikoaren ondorio larriak arintzeko akordioak lortzeko. Ildo horretatik, «Lanbideren jarduera lan-eskatzaileen eta enpresen arteko bitartekotza egitera bideratu beharra» dagoela nabarmendu du Aburtok. Era berean, enplegu-politikei buruzko eskumen guztiak -pasiboak barne- eskatu ditu, «bien konbinazioa oinarrizko tresna baita langabeziari aurre egiteko».

Gizarte-politiken arloan, Jaurlaritzaren erantzukizuna lege-garapena eta arautzeko ahalmena dira funtsean. «Horregatik, herritarrei zerbitzua emateko modurik onena garapen jasangarria egitea da, baliabideak kudeatzeko ardura duten erakundeen -foru-aldundien eta udalen- aukera errealekin bat datorrena», adierazi du Enplegu eta Gizarte Politikako sailburuak.

Amaitzeko, hauxe adierazi du Juan María Aburtok: «Uneotan, etxebizitza-politikek, gehienbat, krisi ekonomikoaren ondorioz sortutako gizarte-larrialdiko egoerei erantzun behar diete, gizarte-alokairua sustatuta».

 

 

Oraindik ez dago iruzkinik
Iruzkinak itxita daude dokumentu honetan
Komunikabideek behera kargatzeko
Ekitaldiko kargudunak
(X legealdia 2012 - 2016)