Osasun Publikoak prebentzio-neurriak mantentzen ditu, airean bentzeno-mailak gorabeheratsuak direla egiaztatuta

MUSKIZKO BENTZENO INTZIDENTZIAREN EGOERA EGUNERATZEA

Azken orduetan osasun-agintariek Muskizen egin dituzten neurketa teknikoen emaitzek egiaztatu dute gorabeherak izan direla aireko bentzeno-kontzentrazioetan. Horregatik, Osasun Publikoak atzo ezarritako PREBENTZIO NEURRIAK mantentzen ditu, arratsaldeko 14:00etan beste analisi bat egin arte.

Segurtasunean, Ingurumenean eta Osasunean (Osasun Publikoa) eskumena duten Eusko Jaurlaritzako sailek egoeraren jarraipena egiten jarraitzen dute, Euskadiko Airearen Kalitatea Kontrolatzeko Sarearen datuen bidez, inguruneko laginketa espezifikoen eta enpresa isurketak murrizteko gauzatzen ari den neurri zuzentzaileen bidez.

Eskuragarri dauden azken datuen arabera, goizaldean Petronorren inguruko Airearen Kalitatearen Sareko estazioetako balioak 8 µg/m³ inguruan mantendu dira, baina goizeko 7:00etatik aurrera adierazle horiek areagotu egin dira. Gorabehera hori dela eta, beharrezkoa da atzo herritarrei emandako prebentzio-gomendioei eustea; aitzitik, ahalik eta arretarik handienarekin, segurtasun-, ingurumen- eta osasun publikoko zerbitzuek aktiboki mantentzen dute egoeraren zaintza.

Gaur, balioen bilakaera ebaluatzen jarraituko da, kontuan hartuta eguneko orduetan tenperaturak gora egiteak aldaketak eragin ditzakeela balio horietan. Une oro prebentzioz jokatzen ari da, airearen kalitatea etengabe kontrolatuz, eta unean-unean informatzeko konpromisoarekin, gomendio berriak hartu behar badira edo egoera erabat normalizatuta geratzen bada.

Berriz abisatu arte, esposizioa murrizteko prebentzio-neurri hauek hartzea gomendatzen da:

Herritar guztientzako neurriak

• Ahal den guztietan, barruko espazio itxietan egotea.
• Ateak eta leihoak itxita edukitzea.
• Kanpoan jarduera fisiko egitea saihestea.
• Barruko espazioen aireztapen luzea saihestea, eta, ahal izanez gero, birzirkulazio-moduan girotzeko sistemak erabiltzea (kanpoko airearen sarrerarik gabe).

Talde bereziki zaurgarriak

Arreta berezia jartzea gomendatzen da arnas aparatuko gaixotasunak edo gaixotasun kardiobaskularrak dituzten pertsonetan, haurretan, adinekoetan eta haurdun dauden emakumeetan. Talde horiek saihestu egin beharko dute gertakariak irauten duen bitartean kanpoko airearekiko behar ez den esposizioa.

Kirol-zentroak, hezkuntza-zentroak eta zentro soziosanitarioak

Aire zabaleko jarduerak etetea eta adingabeak eta mendeko pertsonak aireztapen kontrolatua duten barnealdeetan mantentzea gomendatzen da.